
局米旁大师教言集MP152外定续义疏.持明如意
9-4-1a
外定续义疏.持明如意
名义
༄༅། །བསམ་གཏན་ཕྱི་མའི་རྒྱུད་དོན་རྣམ་པར་བཤད་པ་རིག་སྔགས་འཛིན་པའི་ཡིད་ཀྱི་འདོད་འཇོ་ཞེས་བྱ་བ་བཞུགས་སོ། །
9-4-1b
ན་མོ་གུ་རུ་མཉྫུ་གྷཱོ་ཥཱ་ཡ། རིག་སྔགས་ཡོངས་ཀྱི་འཁོར་ལོས་སྒྱུར་མཆོག་དང་། །གསང་འཛིན་གསང་བའི་བདག་པོ་རྡོ་རྗེ་འཛིན། །འཇམ་དཔལ་དཔལ་དང་ལྡན་ལ་གུས་བཏུད་ནས། །བསམ་གཏན་ཕྱི་མའི་རྒྱུད་དོན་རྣམ་པར་བཤད། །དེ་ལ་འདིར་གསང་སྔགས་དང་རིག་སྔགས་རྣམས་བསྒྲུབ་པའི་ཐབས་ཀྱི་མན་ངག་ཟབ་མོ་བསམ་གཏན་ཕྱི་མ་རིམ་པར་ཕྱེ་བའི་རྒྱུད་འདི་འཆད་པ་ལ། མཚན་དོན། འགྱུར་ཕྱག གཞུང་དོན། མཇུག་དོན་བཞི་ལས། དང་པོ། རྒྱ་གར་སྐད་དུ། དྷྱཱ་ནོཏྟ་ར་པ་ཊ་ལ་ཀྲ་མ། དེ་ཉིད་བོད་སྐད་དུ་བསྒྱུར་ན། དྷྱཱ་ན་བསམ་གཏན་ཨུཏྟ་ར་བླ་མ་དང་ཕྱི་མ་སོགས་ལ་འཇུག་པ་ལས་སྐབས་འདིར་ཕྱི་མ། པ་ཊ་ལ་ཀྲ་མ་རིམ་པར་ཕྱེ་བ་ཞེས་གསུངས་ཏེ། བསམ་གཏན་ནི་རིག་
9-4-2a
སྔགས་བཟླ་བའི་ཚེ་སེམས་རྩེ་གཅིག་པའི་བསམ་གཏན་ཇི་ལྟར་བྱ་བ་གང་ཞིག སྔགས་འགྲུབ་པའི་ཐབས་ཀྱི་གཙོ་བོར་གྱུར་པ་དེ་འདིར་བསྟན་པས་ན་བསམ་གཏན་ཞེས་བྱ་ཞིང་། དེ་ལ་ཕྱི་མ་ཞེས་བྱ་བ་ནི། བྱ་སྤྱོད་གཙོར་གྱུར་རིག་སྔགས་ཀྱི་རྒྱུད་རྣམ་པ་མང་པོ་གསུངས་པ་དེ་དག་གི་མན་ངག་ལྟ་བུ་རྗེས་སུ་བསྟན་པ། འདི་ཉིད་རིག་སྔགས་ཀྱི་རྒྱུད་ཀུན་ལ་དགོས་ཤིང་སྙིང་པོར་གྱུར་པ་ཡིན་པའི་ཕྱིར་ཏེ། རྡོ་རྗེ་གཙུག་ཏོར་གྱི་རྒྱུད་ཆེན་པོ་ལས། བཟླས་བརྗོད་ཀྱི་ཡན་ལག་རྣམས་ཀྱི་མིང་བཤད་ཀྱང་། དེའི་ཐབས་བསམ་གཏན་ཇི་ལྟར་བྱ་བའི་ཚུལ་སྐབས་དེར་གསལ་བར་མ་བསྟན་པ་དེ་ཉིད་འདིར་དངོས་སུ་གསལ་བར་སྟོན་པས་ན་དེ་སྐད་ཅེས་བྱའོ། །དེ་ལྟ་བུའི་དགོངས་དོན་ཡན་ལག་དང་བཅས་པ་གསལ་བར་བྱེད་པས་ན་རིམ་པར་ཕྱེ་བ་ཞེས་གསུངས་སོ། །
译敬
གཉིས་པ་
9-4-2b
འགྱུར་ཕྱག་ནི། དཔལ་རྡོ་རྗེ་རྣོན་པོ་ལ་ཕྱག་འཚལ་ལོ། །ཞེས་བསྟན་པ་སྔ་དར་གྱི་དུས་སུ་རྒྱུད་འདི་གངས་ཅན་པའི་སྐད་དུ་བསྒྱུར་བའི་ཚེ་སྤྲུལ་པའི་ལོ་པཎ་ཆེན་པོ་དེ་དག་གིས། འཇམ་དཔལ་རྡོ་རྗེ་རྣོན་པོ་ལ་ཕྱག་མཛད་པའོ། །
正文
གསུམ་པ་གཞུང་དོན་ལ། དགོས་པ་བསྟན་པ་དང་འབྲེལ་བར་གླེང་བསླང་བ་རྣམ་པར་དགོད་པ་དང་། བཤད་བྱ་གཞུང་གི་དོན་རྣམ་པར་བཤད་པ་གཉིས་ཀྱི།
立目的及缘起
དང་པོ། གསང་སྔགས་རྒྱུད་ཀྱི་ཕྱོགས་ལ་ཡང་། །ཞེས་པ་ནས། བསམ་གཏན་གྱིས་ནི་བརྒྱན་པར་བཤད། །ཅེས་པའི་བར་གྱིས་བསྟན་ཏེ། བཟླས་བརྗོད་ཀྱི་བསམ་གཏན་དང་རྣལ་འབྱོར་གྱི་མཚན་ཉིད་གང་ཞིག རིག་སྔགས་དང་གསང་སྔགས་ཀྱི་ཐབས་ཀྱི་མན་ངག་དམ་པར་གྱུར་པ་སྤང་གཉེན་ཕན་ཡོན་དང་བཅས་པ་འདི་ལྟ་བུ། བཅོམ་ལྡན་འདས་རྡོ་རྗེ་འཛིན་ཆེན་པོ་ལས་ཚངས་པ་ས་ཡི་མེ་ཏོག་ཅེས་བྱ་བས་དངོས་སུ་ཐོས་པ་དེ་ཉིད། ཚངས་པ་མི་འཆི་བ་ཞེས་བྱ་བ་ལ་བསྟན་པར་འདོད་ནས་འདི་སྐད་དུ་སྨྲས་ཏེ། དོན་ཆེན་པོ་དང་ལྡན་པ། གས༷ང་སྔ༷གས་རྒྱུ༷ད་ཀྱི༷་ཕྱོག༷ས་ལ༷་ཡ༷ང་། གང་ཟག་ག༷ང་གི༷་བློ༷་ནི༷་མཆོག་ཏུ་མི༷་ཞེ༷ན་པ༷་སྟེ་དམ་པའི་མན་ངག་དང་ལྡན་པར་ནན་ཏན་གྱིས་བརྟགས་ནས་གཏིང་དཔོག་པ་དང་མི་ལྡན་པར་གྱུར་དུ་ཟིན་ཀྱང་། སྔགས་ཀྱི་དོན་དེ༷་ཡ༷ང་རང་བློའི་ཕྱོགས་ཞེན་ཙམ་དུ་ཅི་དགར་བཟུང་ནས་དོན་མེད་ཀྱི་ངག་སྨྲ༷་བ༷ར་སྤྲོ༷་བ༷་ནི༷་དགོས་པ་ཅི་ཡང་མེད་པས་སྨྲ་བ་ངན་པ་དེ་དག་སྤང་བར་རིགས་ཏེ། དེ་དག་ལ་དེ་ལྟ་བུ། མ༷་སྨྲས༷་ན༷་ནི༷་མི༷་འཚོ༷་བ་ཉིད་དུ་གྱུར་པའ༷མ་མ་སྨྲས་ཐབས་མེད་པ་ཅི༷་ཞིག་བྱུང་ཞེས་པའི་དོན་ཏེ།
9-4-3a
སྔགས་ཀྱི་དགོངས་དོན་རྟོག་གེའི་རིགས་པ་སོགས་ཀྱིས་དཔྱད་ནས་ཆུད་ཟ་བའི་བཤད་པ་འཁྱམས་པོ་དེ་འདྲ་རང་བསླུས་གཞན་བསླུས་ཀྱི་རྒྱུར་འགྱུར་ཞིང་ཉེས་པ་ཆེ་བའི་ཕྱིར་རོ། །ཅིའི་ཕྱིར་སྔགས་རྒྱུད་ཀྱི་ཚིག་ལ་དཔྱད་ནས་ཤེས་པར་བྱ་བའི་ཡུལ་མ་ཡིན་སྙམ་ན། གས༷ང་སྔ༷གས་ཀྱི་རྒྱུད་རྒྱ༷་མཚོ༷་ཆེན༷་པོ༷་ལྟ་བུ་འ༷དི་ནི། རྟོག་གེའི་ལམ་གྱི་དཔེ༷་ཡིས་ཉེ་བར་འཇལ་བ་ད༷ང་། མངོན་སུམ་གྱི་ཚད༷་མ༷་དང་། གཏན༷་ཚིག༷ས་ཀྱི་རྟགས་ས༷མ། དེ་ལས་རྗེ༷ས་སུ༷་དཔ༷ག་པ༷འ༷མ། མདོར་ན་མན་ངག་མེད་པར་རང་གི་རྣམ་པར་དཔྱད་པའི་ཤེ༷ས་ར༷བ་ཀྱིས༷་རྟོག༷ས་པ༷ར་ནུ༷ས་པ་མ་ཡི༷ན་ནོ༷། །དེའི་ཕྱིར་ཡང་དག་པའི་རྒྱུད་ཀྱི་ལུང༷་ད༷ང་། དམ་པའི་མན་ང༷ག་གི་དོ༷ན་དང་ལྡན་པ་མེ༷ད་པ༷ར། ག༷ང་ཞི༷ག་སྔགས་ཀྱི་དགོངས་དོན་དུ་རློམ་པའི་ལ༷མ་གཞ༷ན་དུ་འཇུ༷ག་པ༷་དེ༷་དག བསྐ༷ལ་པ༷་ད༷ག་ནི༷་བ༷རྒྱ་རུ༷་འབ༷ད་ན་ཡ༷ང་། སྔ༷གས་བཟླས་པ་སོགས་ཀྱི་ཐབས་ལ༷ས་དངོ༷ས་གྲུབ༷་མི༷་ཐོ༷བ་བོ༷། །སྔགས་ཀྱི་ལུ༷ང་དང༷་དེ་དོན་གནད་དུ་འབྱོར་བའི་མ༷ན་ང༷ག་མ༷་ལུས༷་པ༷། གང་ཟག་ག༷ང་གི༷ས་ཡོ༷ངས་སུ༷་སྤ༷ངས་པ༷་དེ་ད༷ག་ལ། སྔགས་ཀྱི་གྲུ༷བ་པ༷་ཉམས་སུ་མྱོང༷་བ༷་ལ༷་ལ༷་ཞི༷ག་ཡོ༷ད་ད༷མ་ཟེར་ན་དེ༷་ནི༷་མཐའ་གཅིག་ཏུ་མེ༷ད་པ༷འོ་ཞེས་སྨྲས་པར་བྱས་པ་ཡིན་ཏེ། དེ་ལྟ་བུ་མི་སྲིད་ཅེས་པའི་ཐ་ཚིག་གོ། དེ༷ས་ན༷་གས༷ང་སྔ༷གས་ཀྱི་བད༷ག་ཉི༷ད་རྒྱ་མཚོ་ལྟར་ཆེ༷་བར་གྱུར་པ། དངོ༷ས་གྲུ༷བ་སྣ་ཚོགས་ཀྱི་རླ༷བས་ནི༷་རབ་ཏུ་འཁྲི༷གས་པ༷་ཅ༷ན། ཕལ་པའི་བློས་བསམ་གྱིས་མི་ཁྱབ་པའམ། བས༷མ་ཡ༷ས་
9-4-3b
ཤིང་གཏིང༷་མཐའ་ནི༷་དཔ༷ག་པར་དཀ༷འ་བ༷་ཡི། དགོངས་དོན་ཟབ་མོ་རྟོག༷ས་པ༷ར་ནུས༷་པ༷་གང་གིས་དེ་ལྟར་སྔགས་རྒྱུད་ཀྱི་དགོངས་དོན་ཚུལ་བཞིན་ལེགས་པར་བཤད་ན། སྨྲ་བ་ཐམས་ཅད་ཀྱི་ནང་ན་སྨྲ༷་བའི༷་མཆོག༷་ཏུ་གྱུར་པ་ཡིན་ཏེ། དོན་ཆེ་ཞིང་ཟབ་མོ་རྟོགས་པར་དཀའ་བའི་གནས་ལེགས་པར་བཀྲལ་བའི་ཕྱིར་རོ། །ག༷ལ་ཏེ༷་སྔགས་ཀྱི་གནད་དེ༷་ལྟར༷་མི༷་ཤེས༷་པ་ཞིག་ན༷། ཚང༷ས་པ༷་མི་འཆི་བ་ཁྱོད་ཀྱིས་སྔགས་ཀྱི་དགོངས་གནད། ཟབ་མོ་ཇི༷་ལྟར༷་ཤེས༷་པ༷་དེ་སྨྲོས༷་ཤིག གལ་ཏེ་ཁྱོད་སྔགས་ཀྱི་དགོངས་གནད་ཟབ་མོ་ཡ༷ང་དག༷་པར་སྨྲ༷་བ༷ར་མི༷་སྤྲོ༷་ན༷། ཚངས་པ་ས་ཡི་མེ་ཏོག་ང༷་ཡི༷ས་རྡོ་རྗེ་འཛིན་པ་ཉིད་ལས་ཇི་ལྟར་ཐོས་པའི་དོན་བཤ༷ད་ཀྱི༷ས་ང༷་ཡི་ཚིག་ལ༷་ཉོ༷ན། ཞེས་གླེང་བསླངས་ནས། སླར་ཡང་སྨྲས་པ། བྱ༷ང་ཆུབ༷་ཀྱི་སེ༷མས་ད༷ང་། བདག་དང་སྔགས་དང་བཟླས་བརྗོད་ཀྱི་དེ༷་ཉི༷ད་གསུམ༷་གྱི་དོན་ག༷ལ་ཏེ༷་ལེགས་པར་ཤེས༷་ན༷་དངོ༷ས་གྲུ༷བ་ཀྱི་སྣོ༷ད་དུ་འགྱུར་ལ། དེ༷་ད༷ག་ལེ༷གས་པ༷ར་མི༷་ཤེ༷ས་ན༷། ཁྱོ༷ད་ཀྱིས༷་སྔགས་ལ་བརྟེན་ནས་དངོ༷ས་གྲུ༷བ་ཀྱང་ཅི༷་ཞི༷ག་འཐོ༷བ་སྟེ་མི་འཐོབ་བོ། །གཞན་ཡང་རི༷ག་སྔ༷གས་ལ༷ས་ནི༷་རིག་སྔག༷ས་གྲུབ༷་པ༷་པོ༷་གཞ༷ན་ཡིན་ན༷མ། ཡང་ན་གཞ༷ན་མི༷ན་པ་གཅིག་ཏུ་གྱུར་པ་གང་ཡིན་ཞེས་ཁྱོད་ལ་འདྲི་ན། གལ་ཏེ་དེ་གཉིས་གང་རུང་ཡིན་པར་སྨྲས་ན་ཅི༷་ཞིག༷་ཉེས༷་པར་འགྱུར་སྙམ་ན། ག༷ལ་ཏེ་རིག་སྔགས་དང་དེའི་གྲུབ་པ་པོ་ཞེས་བྱ་བ་གཞ༷ན་ཡིན་པར་གྱུར་ན༷་འབྲེལ་བ་མེད་པས་ནམ་ཡང་འགྲུབ༷་པ༷ར་མི༷་འགྱུར༷་རོ། །འོ༷ན་ཏེ༷་གཞ༷ན་མི༷ན་པར་
9-4-4a
བསམ་ན། རིག་སྔགས་བཟུང་བ་ཙམ་གྱིས་གྲུ༷བ་པ༷་ཉི༷ད་དུ་འགྱུར་ཏེ། དེའི་རྒྱུ་མཚན་ག༷ལ་ཏེ༷་གཞ༷ན་མི༷ན་པར་འདོད་པ་ཁྱོད་ཀྱི་ལྟར་ན་ཁྱོ༷ད་རིག་སྔགས་འཆང་བ་ཡིན་པས་དེའི་གྲུབ༷་པའང་དེ་དང་མཉམ་དུ་ཐ་མི་དད་པར་ཡོད་པས་ཁྱོད་རིག་སྔགས་གྲུ༷བ་པ༷་ཉི༷ད་དུ་གྱུར་ཟིན་པ༷ས། ནམ་མཁ༷འ་ལ༷་སོ༷གས་པ༷ར་ད༷་ལྟ་ཉིད་དུ་ཐོགས་པ་མེད་པར་སོ༷ང་ཞི༷ག གལ་ཏེ་རིག་སྔགས་དང་དེའི་ནུས་པ་གྲུབ་པ་ཐ་མི་དད་ཅིང་། གྲུབ་པ་ཉམས་སུ་མྱོང་བ་པོའང་རིག་སྔགས་དེ་འཛིན་པ་པོ་ལས་ཐ་དད་དུ་བྱ་བ་མེད་པའི་ཕྱིར། གྲུབ་ཟིན་པར་རིགས་པས་གྲུབ་ཀྱང་ནམ་མཁའ་ལ་འགྲོ་བ་སོགས་སྔགས་གྲུབ་པའི་ཡོན་ཏན་དངོས་སུ་སྣང་བ་དེ༷་སྟེ༷་མི་ནུས་པའམ་དེ་ལྟ་བུ་ཅི་ཡང་ཡོད་པ་མི༷ན་ན༷། སྔགས་དང་དེ་ཡི་གྲུབ་པ་གཅིག་ཏུ་ཁས་བླངས་པ་འདི་ནི་རྫུན༷་ཚི༷ག་ཏུ་ཟད་པའམ་གྱུར་པ༷ས་རིགས་པ་མི་ཤེས་པ་བ༷་ལ༷ང་རྫི༷་ད༷ང་ལྷན༷་ཅི༷ག་ཅི་དགར་སྨོས༷་སུ་རུང་བ་ཙམ་ལས། རིགས་པའི་ལམ་ཤེས་པའི་མཁས་པ་ལ་སྨྲ་བར་བྱ་བའི་ཚིག་ཉིད་དུ་མི་འགྱུར་རོ་ཞེས་སྨྲས་སོ། །དེའི་ཚེ་ན་མི༷་འཆི༷་བ་ཚང༷ས་པ་ཆེ༷ན་པོ་ཕ༷་མཆོ༷ད་ཅེས་བྱ་བ་དེ་ཉིད་ཀྱིས༷། རང་གི་བློས་ཡོ༷ངས་སུ༷་བས༷མས་ན༷ས་ལན་གྱི་ཚིག༷་སྨྲ༷ས་པ༷་ནི། གང་འདིར་ཚངས་པ་ས་ཡི་མེ་ཏོག་འཆར་བྱེད་ཅེས་བྱ་བ། མི༷་མཇེ༷ད་ཀྱི་བད༷ག་པོ༷ས་ག༷ང་ཇི་སྐད་སྨྲས༷་པ༷་དེ་བཞིན་དུ། རིག་སྔགས་དང་དེའི་གྲུབ་པ་གཞ༷ན་དུ་གྱུར་པ༷ས་ནི། རིག་སྔགས་དེ་ཉིད་ཟློས་བ་པོ་བད༷ག་ལ༷་ནམ་ཡང་དངོ༷ས་གྲུབ༷་མེ༷ད་པ་དེ་ལྟར་འགྱུར་མོད་ཀྱི། རི༷ག་སྔགས་
9-4-4b
ལ༷ས་དེ་ཡི་གྲུ༷བ་པ༷་གཞ༷ན་མི༷ན་ན༷་རིག་སྔགས་བཟླས་པ་ལས་བྱུང་བའི་དངོ༷ས་གྲུ༷བ་དེ་ཉིད་རིག་སྔགས་དེ་ཟློས་བ་པོ་བད༷ག་ལ༷་གྲུབ་པ་ཉིད་ཡོ༷ད་ད༷མ་སྙམ་སྟེ། ཅི༷་དེ༷་ལྟར༷་གྱུར༷་ན༷་ཅི༷་ཞི༷ག་ཉེ༷ས་ཏེ་ཉེས་པ་ཅི་ཡང་མེད་དོ་སྙམ་དུ་བདག་སེམས་ལ། འོན་ཏང་འདོད་པ་དེ་ལ་འག༷ལ་བ༷་ཅི༷་ཞི༷ག་ཡོ༷ད་ཅེས་སྨྲས་སོ། །དེ་ལ་ཚངས་པ་ས་ཡི་མེ་ཏོག་གིས་ལན་སྨྲས་པ། ཨེ༷་མ༷འོ༷་ཚང༷ས་པ༷་མི༷་འཆི་བ་ཁྱོ༷ད་ཀྱི༷་བློ༷་འདི་ལྟ་བུ་ནི། ཤི༷ན་ཏུ༷་ཉེས་པའི་དྲི༷་མ༷་མེ༷ད་པ༷་ད༷ག་ཡིན་པར་བསམས་ནས་ཚིག་དེ་སྐད་སྨྲས་མོད་ཀྱི། ཤེ༷ས་ར༷བ་གས༷ལ་བ༷་དང་ལྡན་པ་ཚངས་པ་ས་ཡི་མེ་ཏོག་ང༷ས་ཚུལ་འདི་ལ་གཞིག་ཅིང་བས༷མ་ན༷། ཚི༷ག་རེ༷་རེ་ལ༷་ཡང་ནི༷་མི་འཐད་པའི་སྐྱོན་གྱིས་རྙོ༷ག་པ༷་བཞི༷ན་དུ་མཐོང་སྟེ། འདི་ལྟར་ཁྱོད་ཀྱིས་སྔགས་ལས་གྲུབ་པ་གཞ༷ན་དུ་གྱུར་པ༷ས་ཁྱོ༷ད་ལ༷་དངོ༷ས་གྲུ༷བ་མེ༷ད་ཅིང་། གཞ༷ན་མི༷ན་པ༷འི་སྔགས་ནི༷་དངོ༷ས་གྲུབ༷་ཀྱི་རྒྱུ༷་ཡིན་པར་རིགས་ཤིང་འཐད་པའི་ཕྱིར་སྔགས་དང་གྲུབ་པ་གཞ༷ན་མི༷ན་པ༷་ལ༷ས་སྔགས་གྲུབ༷་པར་འདོ༷ད་དོ་ཞེས་སྨྲ་བ་ན༷། ཚིག་དེ་འདྲ་སྨྲ་བ་ནི་སྨྱོན༷་པ༷་ཉི༷ད་ནི༷་ཡི༷ན་པ༷ར་འགྱུར༷་ཏེ། གོང་དུ་བཤད་པ་ལྟར་སྔགས་དང་དེའི་གྲུབ་པ་གཞན་མིན་པས་ན་སྔགས་གཟུང་བ་ཙམ་གྱིས་གྲུབ་པར་གྱུར་ཏེ་མེ་བཟུང་བས་བསྲེག་པ་དངོས་སུ་སྣང་བ་དང་ཚུལ་མཚུངས་པར་འགྱུར་རོ། །སྔགས་བཟུང་ཡང་གྲུབ་པ་མི་སྣང་ན་དེ་གཅིག་ཡིན་པར་ཡང་ཇི་ལྟར་སྨྲ་རིགས་ཏེ་སྔགས་ཡོད་ཀྱང་གྲུབ་པ་མེད་པས་ཐ་མི་དད་ཀྱི་གཅིག་ལ་གཅིག་ཡོད་པ་དང་གཅིག་མེད་པའི་ཁྱད་པར་ཇི་ལྟར་རུང་། དེས་ན་གཅིག་ཏུའང་གྲུབ་པ་མེད་པར་འགྱུར་
9-4-5a
ཏེ་སྔགས་དང་དེ་གྲུབ་པ་ཐ་དད་དུ་འགྱུར་རོ་ཞེས་སྨྲས་སོ། །དེ་ནས་ཚངས་པ་མི་འཆི་བས་སྨྲས་པ། འགྲོ༷་བ༷འི་བད༷ག་པོ༷་ཞེས་ཚངས་པ་ཆེན་པོ་ས་ཡི་མེ་ཏོག་ཉིད་ལ་བོས་ནས་ཇི༷་ལྟར༷་ན༷་གསང་སྔགས་དང་རིག་སྔགས་རྣམས་ལས་དངོ༷ས་གྲུབ༷་མི་བསླུ་བར་ཡོ༷ད་པ༷ར་ཁ༷ས་འཆེ༷་བ༷། ཡེ༷་ཤེ༷ས་ཀྱི༷་སྒྲོན༷་མ༷ར་གྱུར་པ༷་ཁྱོ༷ད་ཀྱིས། བདག་ལ་ཇི༷་ལྟར༷་ཕ༷ན་པ༷་བཤ༷ད་དུ༷་གསོ༷ལ་ཞེས་ཞུས་སོ། །དེ་ལ་ཚངས་པ་ཆེན་པོ་ས་ཡི་མེ་ཏོག་གིས་སྨྲས་པ། བད༷ག་གི༷ས་རྣ༷མ་པ༷ར་དཔྱ༷ད་ན༷་ནི༷། རི༷ག་སྔགས་ལ༷ས་དེའི་གྲུབ་པ་ཉིད་གཞན་ན༷མ་མི༷་གཞ༷ན་པ་ཡང་མི༷ན་ཞིང་། དེ་ལྟར་གཞ༷ན་མི༷ན་དང་མི༷་གཞ༷ན་པ་ཡང་མ༷་ཡི༷ན་པ༷ས་ན། རྒྱུ་མཚན་དེ་ཉིད་ཀྱི་ཕྱིར། སྔགས་ལས་དངོས་གྲུབ་ཐོབ་པ་ཡོད་ལ། བད༷ག་ནི༷་སྔགས་དེ་ཉིད་སྒྲུབ་པ་པོ་རང་གིས་ཡིད་ལ་ཞེན་པར་བསམ་ཏེ༷་ཡང་ཡང་གོ༷མས་པ་ལ༷ས་ནམ་ཞིག་ནུས་པ་མཐུ་ཅན་དུ་གྱུར་ནས་དངོ༷ས་གྲུ༷བ་འཐོ༷བ་པར་འདོད་དེ། རྒྱུ་རྐྱེན་རྟེན་འབྲེལ་གྱི་དབང་གིས་སྣང་བའི་ཆོས་ཉིད་མཐའ་གཞན་དུ་བརྟག་པར་དཀའ་ཡང་བསླུ་བ་མེད་པར་སྣང་ཞིང་དོན་བྱེད་པ་ཉིད་དུ་འདོད་དོ། །དེ་ལྟར་གོམས་པ་ལས་དངོས་གྲུབ་འབྱུང་བའི་འཐད་པ་བརྗོད་པ། ཤེ༷ས་བྱ༷་ཐམས་ཅད་ཀྱི་ནང་ན་བླ་ན་མེད་པ་ག༷ང་ཡི༷ན་པ༷འི་རྣམ་པ་ཐམས་ཅད་མཁྱེན་པའི་ཡེ༷་ཤེ༷ས་དེ༷་ཡ༷ང་རང་གིས་ལམ་གོ༷མས་པ་ལས་འཐོ༷བ་པར་འགྱུར་ན༷། གསང་སྔགས་ལ༷ས་ཀྱི༷་ཆོ༷་ག་ཁྱད་པར་ཅན་འདི༷་ད༷ག་གི༷ས། གནས་སྐབས་དང་མཐར་ཐུག་གི་དངོ༷ས་གྲུ༷བ་འཐོབ་ཏུ་ཡོ༷ད་པ་ཅི༷་
9-4-5b
ཞི༷ག་སྨོས་ཏེ་སྨོས་མི་དགོས་སོ། །དེ་ཡང་བཟླ༷ས་བརྗོ༷ད་ཀྱི་དེ་ཁོ་ན་ཉིད་དང་། ལྷ༷་ཡི༷་དེ༷་ཁོ་ན་ཉི༷ད་ད༷ང་། བད༷ག་གི༷་དེ༷་ཁོ་ན་ཉི༷ད། སངས་རྒྱས་ཀྱིས་རྒྱུད་རྣམས་སུ་གསུངས་པ་འདི་ཇི༷་ལྟ༷་བ༷་ནི། གན༷ས་རྟེན༷་ཏེ་འཇིག་རྟེན་པའི་ལྷ་ཆེན་པོ་སོགས་ཀྱིས་བཤད་པའི་རྒྱུད་དང་རིག་བྱེད་སོགས་ཀྱི་གཞུང་གཞ༷ན་ལ༷་མེད་པ༷ར་གྱུར་པ་དེ་ཡིས་ནི། སངས་རྒྱས་ཀྱིས་གསུངས་པའི་སྔགས་ཀྱི་ཆོ་ག་འདི་ལྟ་བུ་འཇིག་རྟེན་གསུམ་ན་མཚུ༷ངས་པ༷་མེ༷ད་པ༷ར། ཚངས་པ་ས་ཡི་མེ་ཏོག་བད༷ག་གི༷ས་རྟོག༷ས་སོ། །སྐབས་འདིར་བིཥྚ་བཾ་ཞེས་པ་གནས་རྟེན་ཏེ། འགྲོ་བ་དང་སྲིད་པ་གནས་རྟེན་རྣམས་འཇིག་རྟེན་གྱི་མིང་གི་རྣམ་གྲངས་སུ་བཤད་པའི་གནས་རྟེན་དེ་ཡིན་འདྲ་སྙམ་མོ། །དེ་ལྟར་གླེང་བསླངས་པའི་ཚི༷ག་སྔ་མ་སྔ་མ་ལ༷ས་ཕྱི་མ་ཕྱི་མའི་ཚིག༷་ཏུ༷་འཕྲོ༷ས་པ༷་བྱས་པ་ལ༷ས། ཚ༷ངས་པ་ཆེ༷ན་པོ་མི༷་འཆི༷་བ་ཞེ༷ས་བྱ་བ༷་སྔགས་ཀྱི་དངོ༷ས་གྲུ༷བ་འདོ༷ད་པ༷་སྐ༷ལ་པ་ཆེ༷ན་པོ༷་པ་དེས། བྱ་རྒྱུད་རྡོ་རྗེ་གཙུག༷་ཏོར༷་གྱི་རྒྱུ༷ད་ཀྱི་ཕྱོགས་གཅིག་བཟླས་བརྗོད་ཀྱི་མན་ངག་བསམ་གཏན་ཕྱི་མ་འདི་ནི༷་ཉན༷་པ༷ར་བྱེ༷ད་པར་གྱུར་ཏོ། །དེ༷་ན༷ས་ཚ༷ངས་པ༷་ཆེན༷་པོ༷་མི་འཆི་ཕ་མཆོད་དེ༷་ཉིད་ཀྱིས་རྡོ༷་རྗེ༷་གཙུག༷་ཏོར༷་གྱི་རྒྱུད་སྔར་ཉན༷་པ༷་ལ༷། ཚངས་པ་ཆེན་པོ་ས༷་ཡི༷་མེ༷་ཏོག༷་འཆ༷ར་བྱེ༷ད་པ༷ས། རྡོ་རྗེ་གཙུག་ཏོར་གྱི་རྒྱུད་ཀྱི་མན་ངག སྔགས་བཟླ་ཚུལ་གྱི་བས༷མ་གཏ༷ན་གྱིས༷་ནི༷་བརྒྱན༷་པ༷ར་བྱས་པ་འདི་ཉིད་བཤ༷ད་དོ། །ཞེས་འདི་ཡན་ཆད་ཚིག་ཁ་གསལ་བས་འགྲེལ་པ་མི་དགོས་པར་དགོངས་ནས་སངས་རྒྱས་གསང་བའི་འགྲེལ་བར་མ་བཤད་ལ་འགྲེལ་བ་གཞན་
9-4-6a
ཡང་མ་མཐོང་མོད། ཚིག་གི་འབྲུ་གནོན་ཅུང་ཟད་འདིར་བགྱིས་པ་ཡིན་ལ་ཧ་ཅང་ནོར་དོགས་ཆེན་པོ་མི་སྣང་ཡང་ཅུང་ཟད་རེས་ཚིག་སྦྱར་ཚུལ་ལ་སྐྱེད་འདོན་རྒྱུ་འདྲ་མཐོང་ན་མཁས་པ་དག་གིས་དེ་ལྟར་མཛད་འཚལ་ལོ། །
说所诠论义
གཉིས་པ་བཤད་བྱ་གཞུང་གི་དོན་ལ། དགོས་པ་བསྟན་ཅིང་ཡིད་ཆེས་པའི་ལོ་རྒྱུས་བཅས་བཤད་པར་དམ་བཅས་པ་དང་། བཤད་བྱ་དངོས་བཤད་པ་གཉིས།
说目的及传记并立宗
དང་པོ། དེ་ནས་ཡེ་ཤེས་ཀུན་རྫོགས་པ། །ཞེས་པ་ནས། རྟག་ཏུ་རྒྱུན་དུ་སྦྱོང་བར་བྱ། །ཞེས་པའི་བར་གྱིས་བསྟན་ཏེ། དེ་ལྟར་གླེང་བསླངས་བའི་རྗེས་ཐོག དེ༷་ན༷ས་འཕགས་པའི་ཡེ༷་ཤེ༷ས་ཆེན་པོ་ཀུན༷་ནས་རྫོ༷གས་པ༷་ཉིད་དུ་བྱེད་པ་ནི་རིག་སྔགས་དང་གསང་སྔགས་ཡིན་ལ། རི༷ག་སྔ༷གས་དང་གས༷ང་སྔ༷གས་དེ་ཉིད་སྒྲུབ་པའི་ཐ༷བས་ཆེན་པོ་ཉིད་དུ་གྱུར་པ་གང་དེ༷་ནི། འདི་ལྟར་བསམ་གཏན་དང་ལྡན་པའི་ཡིད་ཀྱི་ལས་ཕྲ༷་བ༷་འདི་ཉིད་སྟོན་པ་མཚུངས་པ་མེད་པ་དེ༷་བཞི༷ན་གཤེ༷གས་པ༷ས་གསུ༷ངས་ཤིང་། ལྷ་ཆེན་པོ་སོགས་ཀྱིས་བཤད་པའི་བཟླས་བརྗོད་ཀྱི་ཚུལ་རྣམས་ལས་འཕགས་པའི་གདམས་པ་གང་ཞིག བདག་གི་དེ་ཁོ་ན་ཉིད་ལ་དམིགས་པ་སོགས་བས༷མ་གཏན༷་ཁྱད་པར་ཅན་གྱིས༷་ཀྱང༷་ཤི༷ན་ཏུ་བརྒྱན༷་པ་དང་། སྲོག་རྩོལ་བསྡམ་པ་སོགས་ལྷའི་རྣ༷ལ་འབྱོར༷་དུ་བྱེད་པའི་ཐ༷བས་ནི༷་ཀུ༷ན་ཏུ་རྫོགས་པར་བསྟན་པ༷། དེ་ཉིད་ཀྱི་སྒོ་ནས་ལུས་སེམས་ཀྱི་སྡུ༷ག་བསྔ༷ལ་དང་། དེའི་རྒྱུ་སྡི༷ག་པ༷་མ་ལུས་པ་སེ༷ལ་བ༷་སྟེ༷། དེ་ལྟ་བུའི་ཐབས་འདི་ཉིད་གསང་འཛིན་དཔའ་བོ་ཕྱག༷་ན༷་རྡོ༷་རྗེ༷འི་ཞ༷ལ་ན༷ས་ཚངས་པ་ས་ཡི་མེ་ཏོག་བདག་ལ་དངོས་སུ་
9-4-6b
གསུང༷ས་པའོ། །ཚུལ་འདི་དང་ལྡན་པར་བྱས་པའི་ཡོན་ཏན་གྱི་ཁྱད་པར་ནི་འཁོར་བའི་སྐྱེ༷་བ༷་དང་འཆི༷་བ༷་འཇི༷ག་པར་བྱེ༷ད་པ༷་དང་། སེམས་ཅན་ཐམས་ཅད་ཀྱི་གནོད་སྦྱོར་གྱིས་ཡུལ་དུས་ཀུན༷་ཏུ༷་མི༷་ཚུག༷ས་ཤིང་། རང་གི་སེམས་དབང་དུ་གྱུར་ནས་བརྟ༷ན་པར་བྱེད་པ༷་སྟེ༷། དེ་ལྟར་འཇིག་རྟེན་འདི༷་ད༷ང་ཕ༷་རོ༷ལ་ཏུ་ཡོན་ཏན་གྱི་འབྲས་བུས་དེ་ལྟ་བུ་དག་བྱེ༷ད་པ༷ར་གན༷ས་པར་འགྱུར་རོ། །ཐབས་གོང་བཤད་དེ་ལས་རིགས་གསུམ་གྱི་དཀྱིལ༷་འཁོ༷ར་ཆེན༷་པོ༷་རྣམས་དང་། ལ༷་སོ༷གས་པའི་སྒྲས་དེ་ཡི་རིགས་སུ་གཏོགས་པ་རྣམས་འབྱུང༷་ཞིང་། འབྲས་བུ་འཐོབ་པར་བྱེད་པ་དང་། མདོར་ན་མངོན་པར་མཐོ་བ་དང་ངེས་པར་ལེགས་པ་གང་འདོ༷ད་པ༷འི་དོ༷ན་ནི༷་རྗེ༷ས་སུ༷་བསྒྲུབ༷་པར་ནུས་སོ། །དེ་ལྟར་ཐབས་ཀྱི་ཡོན་ཏན་བསྟན་ནས་དེ་ཉིད་བཤད་པར་དམ་བཅའ་བ་ནི། ཆོ༷་ག༷འམ་བྱ་བ་ག༷ང་ད༷ང་ག༷ང་ད༷ག་གི༷ས་བཟླས་བརྗོད་དང་མེར་གནས་སོགས་བས༷མ་ག༷ཏན་གྱི་ལ༷ས་སམ་བྱ་བ་ལ༷། ག༷ང་ཇི་ལྟར་ག༷ནས་པ༷་ཡི་ཚུལ་དེ་ནི། དེ༷་བཞི༷ན་གཤེགས་པ་ལ༷་ཕྱག༷་འཚལ༷་ན༷ས། དེ༷་ད༷ག་མ༷་ལུ༷ས་བདག་གིས་བཤ༷ད་པ༷ར་བྱའོ༷། །ཞེས་སོ། །དེ་ལ་འོག་ཏུ། རིག་སྔགས་དེ་ཉིད་མ་ལུས་དང་། །ཞེས་སོགས་ཚིགས་སུ་བཅད་པའི་དོན་བཞིན། དེ་ཉིད་གསུམ་ལེགས་པར་ཤེས་ཤིང་། དེའི་དོན་ལ་རྩེ་གཅིག་མ༷ཉམ་པར་བཞག་པའི་བསམ་གཏན་དང་ལྡན་པར་གྱུར་ན་དངོས་གྲུབ་ཚེགས་མེད་པར་ཐོབ་པར་ངེས་པའི་ཕྱིར། ཐོག་མར་དེ་ལྟ་བུའི་བསམ་གཏན་གྱི་བསྔགས་པ་བརྗོད་པ། གསང་སྔགས་
9-4-7a
བསམ་གཏན་ཞེས་བྱ་བ་ལ་སོགས་པས་བསྟན་ཏེ། ག༷སང་སྔ༷གས་དེ་ཡི་བས༷མ་ག༷ཏན་ཞེ༷ས་བྱ༷་བ༷། སྣོད་མིན་ལ་མཆོག༷་ཏུ༷་གས༷ང་བ༷་རྒྱུད་སོ་སོ་ན་ཡང་སྙིང་པོ་ལྟ་བུར་གྱུར་པའི་མན་ངག་འདི་འདྲ་གསལ་པོར་མ་བསྟན་ཅིང་སྦས་པར་གྱུར་པ་འདི་ནི་རྒྱལ་བ་ཉིད་ཀྱིས་རྡོ་རྗེ་གཙུག་ཏོར་གྱི་རྒྱུད་ཀྱི་ཕྱོགས་གཅིག་བསམ་གཏན་ཕྱི་མ་འདིར་མ་སྦས་པར་ཡ༷ང་ད༷ག་པར་གསུང༷ས་པ་ཡིན་ལ། སྒོ་གསུམ་ཉེས་པ་མེད་པར་དྲང་པོར་སྲོང་བའི་དྲ༷ང་སྲོ༷ང་གང་ཞིག ཁྲུས་དང་གཙང་སྦྲ་སྨྱུང་བ་སོགས་ཀྱི་དཀ༷འ་ཐུ༷བ་ཆེན༷་པོ༷་ཅན་དེ་དག་གི་ཡ༷ང་། སྔགས་བཟླས་པའི་བསམ་གཏན་གྱི་ཐབས་དེ༷་ད༷ག་མེ༷ད་ན༷་སྔགས་བཟླས་པ་ལ་ཆེར་བརྩོན་ཡང་མི༷་འགྲུབ༷་པ་ཡིན་ན་ཕལ་པ་མ་བསྡམ་པ་དག་གིས་ལྟ་ཅི་སྨྲོས་ཏེ་མི་འགྲུབ་བོ༷། །གས༷ང་སྔག༷ས་ཚུལ་བཞིན་སྒྲུབ་པའི་ཐབས་དང་ལྡན་པ་བདག་ཉིད་ལྷར་བསྒོམ་པའི་རྣལ༷་འབྱོར༷་ཅ༷ན་དེ་རྣམ༷ས་ཀྱིས༷། གས༷ང་སྔག༷ས་ཀྱི་བཟླས༷་བརྗོ༷ད་གང་ཞིག དཔེར་ན་མེ༷་འབ༷ར་བ༷་དང་འདྲ་བ་སྒྲིབ་གཉིས་ཀྱི་བུད་ཤིང་སྲེག་པར་བྱེད་ཅིང་། བྱིན་རླབས་ཀྱི་ཚ་དབལ་ཆེ་ཞིང་རྣོ་བ་ཉིད་དུ་གྱུར་པས་སྐྱེ༷་བ་ད༷ང་འཆི༷་བ༷་སོགས་ཀྱི་སྡུག་བསྔལ་འཇི༷ག་པར་བྱེ༷ད་པ༷་འདི་ལྟ་བུ་ནི་རྡོ༷་རྗེ༷་ཅ༷ན་གྱིས༷་སྔོ༷ན་བདག་ལ་གསུང༷ས་སོ༷། །རྒྱུ་མཚན་དེ༷་བས༷་ན། དེ༷་འདི༷ར་གས༷ང་སྔ༷གས་ཀྱི༷་བས༷མ་ག༷ཏན་གང་ཞིག་གསལ་བར་སྣང་ཞིང་། དེས་ཡིད་ལ་རེ་བའི་འབྲས་བུ་སྩོལ་བས་རང་སེམས་ཡོངས་སུ་ཚིམ༷་པར་བྱ༷་བའམ། ཡང་ན་བསམ་གཏན་གྱི་བདེ་བས་རང་རྒྱུད་
9-4-7b
ཡོངས་སུ་ཚིམ་པར་བྱ་བ་བསམ་གཏན་མེ༷་ལྟ་བུ་དེ་ད༷ག་ལ༷། སྔགས་ཀྱི་དངོ༷ས་གྲུབ༷་འདོ༷ད་པ༷་དག༷་གི༷ས་ནི༷། ཉི་མ་རེ་རེ་བཞིན་རྟག༷་པ༷ར་རྒྱུན༷་ཏུ༷་སྦྱོར༷་བ༷ར་བྱ༷་སྟེ། འདོད་པའི་འབྲས་བུ་མངོན་དུ་མ་གྱུར་གྱི་བར་བརྩོན་པ་མི་གཏོང་བར་བྱའོ། །
所诠正文
དེ་ལྟར་བཟླས་བརྗོད་ཀྱི་བསམ་གཏན་ལ་བསྔགས་པ་སྔོན་དུ་བཏང་ནས། བསམ་གཏན་དངོས་བཤད་པ་ལ། དེ་ཉིད་གསུམ་སྤྱིར་བསྟན་པ་དང་། བཟླས་བརྗོད་ཀྱི་དེ་ཉིད་བྱེ་བྲག་ཏུ་བཤད་པ་གཉིས་ཀྱི་དང་པོ་ལ།
总说三真如
དངོས་དང་། དོན་བསྡུ་བ་གཉིས།
正行
དང་པོ། ལྷ་ཡི་སྐུ་ཡི་གནས་དེ་ལ། །ཞེས་པ་ནས། བཟླས་བརྗོད་གཞན་དུ་མི་བྱའོ། །ཞེས་པའི་བར་གྱིས་བསྟན་ཏེ། འདི་དག་གི་སྤྱི་དོན་མདོར་བསྡུས་སྔོན་དུ་བརྗོད་ན་གོ་བདེ་བས་དེ་བཤད་པ་ལ། གཞུང་འདིར་གོང་དུ། རྣལ་འབྱོར་ཐབས་ནི་ཀུན་བསྟན་པ། །ཞེས་གསུངས་པ་བཞིན་དུ་མཆོག་དང་ཐུན་མོང་གི་དངོས་གྲུབ་བདེ་ཞིང་མྱུར་བར་བསྒྲུབ་པའི་ཐབས་ནི་མདོར་བསྡུ་ན་གཉིས་ཏེ། གཙོ་བོ་བཟླས་བརྗོད་ཀྱི་ཡན་ལག་དང་། དེའི་གྲོགས་སུ་ངེས་པར་དགོས་པ་དབང་ནོད་པ་དང་དམ་ཚིག་བཟུང་བ་སྔོན་དུ་སོང་ནས། གཙང་སྦྲ་དང་སྦྱིན་སྲེག་མཆོད་པ་སོགས་ལས་ཀྱི་བྱ་བ་སྣ་ཚོགས་མ་ཉམས་པར་ཉམས་སུ་ལེན་པ་ཡིན་ནོ། །ལམ་དངོས་ནི་དེ་ཉིད་གསུམ་གྱིས་བསྡུས་ཏེ། དང་པོ་བསྒྲུབ་བྱ་རིག་སྔགས་ཀྱི་དེ་ཁོ་ན་ཉིད་ནི། འབྲས་བུ་མཐར་ཕྱིན་པའི་ཡེ་ཤེས་ཀྱི་སྐུ་དེ་བཞིན་གཤེགས་བའམ། དེའི་སྲས་ཀྱི་ཐུ་བོའི་ཚུལ་དུ་སྟོན་པ། འཇམ་དཔལ་ལམ། སྤྱན་རས་གཟིགས་སམ། ཕྱག་ན་རྡོ་རྗེ་འཛིན་པ་
9-4-8a
ལྟ་བུ་ཆོས་ཀྱི་དབྱིངས་དང་གཉིས་སུ་མེད་པའི་ཡེ་ཤེས་ཆེན་པོ་ཉིད་རྣམ་པར་རྟགས་ཀྱི་ཕྱག་རྒྱར་ཤར་བའི་སྐུ་ཡི་དབྱིབས་དང་། རིག་སྔགས་ཀྱི་སྒྲ་དང་། ཕྱག་རྒྱ་ཨུཏྤལ་ལ་སོགས་པའི་རྣམ་པར་སྣང་བ་ལ་བརྗོད་དོ། །བསམ་བྱ་ལྷ་ཡི་རང་བཞིན་དེ་ལ་དབྱེ་ན། གཟུགས་ཀྱི་ལྷ་དང་། སྒྲའི་ལྷ་དང་། དོན་དམ་པའི་ལྷ་དང་གསུམ། དང་པོ་ལའང་སྤྱན་སོགས་ཡན་ལག་རྣམས་ཀྱི་ཆ་དང་ལྡན་པའི་ཡན་ལག་ཅན་གྱི་སྐུ་དང་། དེའི་ཕྱག་རྒྱ་འཁོར་ལོ་དང་རྡོ་རྗེ་ལ་སོགས་པ་གཉིས་སུ་ཡོད་ཅིང་། སྒྲ་ཡི་ལྷ་ལ་སྒྲ་གདངས་དང་། ཡི་གེའི་གཟུགས་ཀྱིས་རྣམ་པར་ཕྱེ་བ་གཉིས། དང་པོ་སྒྲར་བརྗོད་པའི་ཡི་གེ་ལའང་། སྒྲ་གདངས་ཙམ་ལ་དམིགས་པའི་ཡིད་བཟླས་དང་། ཤུབ་བཟླས། ཡིག་འབྲུ་རེ་རེ་ལ་སེམས་པའི་རྟོག་པ་དང་གསུམ་མོ། །དོན་དམ་པའི་ལྷ་ལ། ཆོས་ཀྱི་དབྱིངས་དང་། དེ་ལ་དམིགས་པ་རྣམ་པར་མི་རྟོག་པའི་ཡེ་ཤེས་དང་གཉིས་སོ། །སྒྲུབ་པ་པོ་བདག་གི་དེ་ཁོ་ན་ཉིད་ནི། འདི་ལྟར་འཁོར་བར་བདེ་སྡུག་མྱོང་བ་པོ་དང་། རྣམ་པར་གྲོལ་བ་འཐོབ་པའི་རྟེན་དུ་གྱུར་བ་ནི་ཕུང་པོ་ལྔའི་བདག་ཉིད་ཅན་འདི་ལས་གཞན་དུ་མེད་ལ། ཕུང་པོ་ལྔ་པོ་ནི་དུ་མ་ཚོགས་པ་དང་སྐད་ཅིག་མར་འབྱུང་བའི་རྒྱུན་ཙམ་ཡིན་གྱི། འདི་ལ་བདག་ཅེས་བྱ་བ་ངོ་བོས་གྲུབ་པ་གང་ཡང་མེད་མོད། རྟེན་ཅིང་འབྲེལ་བར་འབྱུང་བའི་སྣང་བ་ལ་སྐུར་བ་གདབ་ཏུ་མི་རུང་བ་སྒྱུ་མ་ལྟ་བུ་འདི་ཙམ་ལ་བདག་གི་དེ་ཁོ་ན་ཉིད་ཀྱི་ཐ་སྙད་བྱ་ཞིང་། ཡང་དག་པར་དཔྱད་ན་ཚོགས་པ་དང་རྒྱུན་རྫས་སུ་མེད་ལ།
9-4-8b
ཆོས་སོ་སོ་བ་ཚོགས་པ་ལ་ཡན་ལག་ཅན་ཞེས་པ་བཏགས་པ་ཙམ་ལས་རྫས་སུ་མ་གྲུབ་ཅིང་། ཡན་ལག་རྣམས་ཀྱང་རྡུལ་ཕྲ་རབ་དང་སྐད་ཅིག་མའི་ཆར་ཡང་གྲུབ་པ་མེད་པས་གཞི་རྩ་དང་བྲལ་བཞིན་རྟེན་འབྱུང་གི་སྣང་བ་ཆུ་ཟླ་ལྟ་བུ་འགོག་པ་མེད་པ་ཡིན་པས། བདག་དེ་ནི་གཟུགས་སོགས་ཀྱི་རྣམ་པ་གང་དུའང་མི་འབྱེད་དེ་ཤེས་པར་བྱར་མེད་ལ། བདག་དེས་གཟུགས་སོགས་ལ་དམིགས་ཤིང་འབྱེད་པའང་རྣམ་པར་སྤངས་པས། ཕུང་པོ་བདག་མིན། དེ་དག་ཕན་ཚུན་ཏུ་ལྡན་པ་མིན། བདག་གིས་ཕུང་པོ་ལ་དབང་བསྒྱུར་བའང་མིན་པས། བདག་ཏུ་འདོགས་པའི་ཀུན་རྟོག་ཐམས་ཅད་ཀྱི་སྤྱོད་ཡུལ་ལས་གྲོལ་བ་ཡན་ལག་མེད་པའམ་ཡན་ལག་རྣམ་པར་གྲོལ་བ་ཞེས་བྱའོ། །གལ་ཏེ་རྣམ་པར་ཤེས་པས་ཡུལ་ཐམས་ཅད་ལ་ལོངས་སྤྱོད་ཅིང་དེ་དང་དེའི་ཐ་སྙད་བྱེད་པས་ན་བདག་རྣམ་ཤེས་ཙམ་ཡིན་ནོ་སྙམ་ན། ཀུན་ཏུ་རྟོག་པའི་བག་ཆགས་ཀྱི་དབང་གིས་རྨི་ལམ་ལྟར་གཟུང་འཛིན་དུ་སྣང་བའི་དུས་ན། ལོངས་སྤྱད་བྱ་དང་སྤྱོད་བྱེད་དུ་སྣང་མོད་ཀྱི། སེམས་དེའི་རང་གི་ངོ་བོར་གྲུབ་པ་རྡུལ་ཕྲ་རབ་ཀྱི་ཆ་ཙམ་ཡང་ཕྱི་ནའང་མེད་ནང་ནའང་མེད། དབྱིབས་དང་ཁ་དོག་སོགས་ཆོས་གང་གི་རྣམ་པར་ཡང་གྲུབ་པ་མེད་པས་སེམས་དེ་ནི་དེ་བཞིན་གཤེགས་པའི་སྤྱན་ལྔས་ཀྱང་བལྟ་བར་བྱར་མེད་པ་ཕྲ་བ་རྟོགས་དཀའ་བ་རང་བཞིན་གྱིས་སྟོང་པ་ཡིན་པས་མདོར་ན་བདག་དང་ཕུང་པོ་དང་རྣམ་རིག་གི་སྤྲོས་པ་ཀུན་ལས་འདས་པ་ཡིན་ནོ། །འགྲེལ་པ་ལས་བདག་གི་དེ་ཁོ་ན་ཉིད་ནི་རིགས་པས་དཔྱད་པའི་སྟོང་པ་ཙམ་ལ་མི་བྱའི། བདག་གི་དེ་ཁོ་ན་ཉིད་
9-4-9a
གཉིས་སུ་མེད་པའི་ཡེ་ཤེས་ཀྱི་མཚན་ཉིད་དེ་ཐོབ་ན་སངས་རྒྱས་སུ་འགྱུར་བས་དེར་འཛིན་གསུངས། མདོར་ན་རྣམ་པར་ཤེས་པའི་མཚན་ཉིད་ཀྱི་ཆོས་ལས་འདས་ཏེ་སྣང་སྟོང་གཉིས་སུ་མེད་པའི་ཡེ་ཤེས་ཀྱི་བཞུགས་ཚུལ་གཏན་ལ་ཕེབས་ན། བདག་གི་དེ་ཁོ་ན་ཉིད་ཀྱང་དེ་ཡིན་ལ་དོན་དམ་པའི་ལྷ་ཡང་དེ་ཚུལ་གཅིག་སྟེ་ཆོས་ཐམས་ཅད་ཀྱི་གནས་ལུགས་དང་དོན་དམ་བྱང་ཆུབ་ཀྱི་སེམས་ཞེས་ཀྱང་བྱའོ། །ཚུལ་དེ་ལ་མཉམ་པར་བཞག་ན་མཚན་མེད་ཀྱི་རྣལ་འབྱོར་ཡང་ཡིན་ནོ། །དེའི་ཕྱིར་སློབ་དཔོན་གྱི་འགྲེལ་པར་བདག་གི་དེ་ཁོ་ན་ཉིད་ནི། བདག་དང་ཕུང་པོ་རྣམ་རིག་གི་སྤྲོས་པ་ལས་འདས་པའམ་ཡན་ལག་མེད་པ་ཞེས་སྤྱིར་བསྟན་ནས། བྱེ་བྲག་ཏུ། དམིགས་པ་གཟུགས་སོགས་མེད་པ། དམིགས་བྱེད་ཀྱི་རྣམ་པ་མེད་པ། མི་གཡོ་བ། རབ་ཏུ་འོད་གསལ་བ། རང་རིག་པས་གསལ་བར་རྗེས་སུ་མྱོང་བ་སྟེ་མཚན་ཉིད་ལྔའམ་དྲུག་ལྡན་དུ་གསུངས་སོ། །དེ་ལྟ་བུའི་བདག་གི་དེ་ཁོ་ན་ཉིད་གཏན་ལ་ཕབས་ནས་དེ་ལ་བློ་གཞག་པར་བྱ་ཞིང་། དེའི་རྗེས་སུ་ལྷའི་རང་བཞིན་དུ་བསྒོམ་པ་ནི་ཀྲྀ་ཡ་ལྷ་དྲུག་ཅེས་གྲགས་པ་སྟེ། དང་པོ་སྟོང་པའི་ལྷ་ནི། བདག་དང་ལྷའི་དེ་ཉིད་རྣམ་པར་མི་རྟོག་པའི་དབྱིངས་སུ་རོ་གཅིག་ཅིང་ཁྱད་མེད་པས་བདག་དང་ལྷ་རང་བཞིན་གཅིག་པའི་ངེས་ཤེས་སམ་ང་རྒྱལ་དུ་བྱའོ་ཞེས་གསུངས་ཏེ་སྣང་བ་མེད་པའི་ཏིང་ངེ་འཛིན་ནོ། །དེའི་ངང་ལས་ལྷ་གང་ཡིན་གྱི་སྔགས་ཀྱི་ཡི་གེའི་སྒྲ་གདངས་ཙམ་ནམ་མཁའ་ལས་གྲགས་པར་བསམ་པ་སྒྲའི་ལྷའོ། །གདངས་དེ་ལས་སྔགས་ཀྱི་ཡི་
9-4-9b
གེའི་གཟུགས་ཀྱི་རྣམ་པར་ནམ་མཁའ་ལ་སྣང་བ་ནི་ཡི་གེའི་ལྷའོ། །དེ་ནས་གཟུགས་ཀྱི་ལྷ་མངོན་དུ་རྫོགས་པར་བྱ་བའི་ཕྱིར། བདག་གི་དེ་ཁོ་ན་ཉིད་ཟླ་བའི་དཀྱིལ་འཁོར་གྱི་རྣམ་པར་གྱུར་པའི་སྟེང་དུ་ལྷའི་ངོ་བོ་སྔགས་ཀྱི་ཡི་གེ་དེ་དག་འདུས་ཏེ། དག་པའི་དངུལ་ཆུ་གསེར་གྱི་ཕྱེ་མ་ལ་ཞེན་པ་ལྟར་འདྲེས་པ་ལས་བདག་དང་ལྷ་གཉིས་སུ་མེད་པ་གཅིག་ཏུ་གྱུར་པའི་རང་བཞིན་ལས་འོད་འཕྲོས་འཕགས་པ་མཆོད་སེམས་ཅན་གྱི་དོན་བྱས་པ་སོགས་ཀྱི་སྒོ་ནས་ལྷག་པའི་ལྷའི་གཟུགས་གང་ཡིན་པ་གསལ་ཞིང་དེ་ལྟར་ཡིན་པའི་ང་རྒྱལ་བྱ་བ་ནི་གཟུགས་ཀྱི་ལྷའོ། །དེ་ནས་དེའི་འཚོག་མ་དང་སྤྱི་གཙུག་སོགས་སུ་ལྷ་གང་ཡིན་པའི་རིགས་ཀྱི་ཕྱག་རྒྱས་བཏབ་པས་བརྟན་ཞིང་བྱིན་གྱིས་རློབ་པ་ནི་ཕྱག་རྒྱའི་ལྷའོ། །དེ་ནས་དེ་ལྟ་བུའི་ལྷ་དེའི་སྐུ་དང་ཡན་ལག་གི་ཆ་ཤས་རེ་རེ་ནས་ཀྱང་གསལ་བཏབ་ལ་དེའི་མཚན་མ་ལ་སེམས་བཟུང་ཞིང་འདི་དང་འདི་ལྟ་བུ་ཞེས་བརྟག་པ་ལ་རྒྱུན་དུ་སེམས་བཞག་པ་ནི། རྟོག་པའི་ལྷའམ་ཀུན་རྫོབ་ཀྱི་སྐུའམ་མཚན་མའི་ལྷ་ཞེས་བྱའོ། །དེ་ལྟ་བུའི་མཚན་བཅས་ལྷའི་རྣལ་འབྱོར་གྱི་བསམ་གཏན་དེ་ཉིད་སྲོག་རྩོལ་བསྡམ་པའི་སྦྱོར་བས་གཅུན་ནས་བསྒོམ་པས། མཐར་རྩོལ་བ་མེད་པར་རྟོག་པ་དང་བྲལ་ཏེ་མངོན་དུ་གསལ་བ་ན་ཏིང་ངེ་འཛིན་ལ་གནས་པ་ཡིན་ནོ། །དེ་ལྟར་ལྷ་སྐུའི་རྣལ་འབྱོར་དང་ལྡན་པའི་སྒོ་ནས་བཟླས་བརྗོད་བྱེད་པ་ལ། བཟླས་བརྗོད་ཀྱི་དེ་ཁོ་ན་ཉིད་ནི་ཡན་ལག་བཞི་དང་ལྡན་པ་སྟེ། གཞུང་གི་དཀྱུས་སུ་འཆད་པར་འགྱུར་རོ། །ད་ནི་གཞུང་གི་ཚིག་དོན་བཤད་པར་བྱ་སྟེ། འདི་ལྟར་རིག་སྔགས་ཀྱི་བཟླས་བརྗོད་
9-4-10a
བྱེད་པར་འདོད་པས། རང་གིས་གང་བསྒྲུབ་པར་བྱ་བའི་ལྷ༷་ཡི༷་སྐུ༷་དངོས་སུ་དམིགས་པའམ་སྐུ་དེ་ཡི༷་གན༷ས་སམ་རྟེན་རི་མོར་བྲིས་པ་ལ་སོགས་པ་དེ༷་ལ༷། སྔགས་བཟླ་བའི་ད༷ང་པོ༷་ཁོ༷་ན༷ར་མེ་ཏོག་ལ་སོགས་པའི་མཆོ༷ད་པ་བྱས་ན༷ས་ནི༷་ཞེས་དེས་མཚོན་ནས་གཙང་སྦྲ་ལ་གནས་ཤིང་བདག་གནས་ཡོ་བྱད་བསྲུང་ཕྱིར་མཚམས་བཅད་པ། ཚོགས་ཞིང་སྤྱན་དྲང་པ་སྡིག་པ་བཤགས་པ་ལུས་དབུལ་བ་སོགས་ཆོ་གའི་སྦྱོར་བ་རྣམས་ཤུགས་ཀྱིས་བསྟན་པ་ཉིད་དུ་ཤེས་པར་བྱའོ། །དེ་ནས་བཟླས་པའི་རྣལ་འབྱོར་གྱི་ཕྱིར། བདེ་བའི་སྟན་ལ་སྐྱིལ་ཀྲུང་ལ་སོགས་པའི་གནས་བཅས་ཏེ་འདུག་ཅིང་། ཞེས་སམ། ཡང་ན་དམིགས་པ་ལ་རྩེ་གཅིག་ཏུ་བྱེད་པའི་རྣ༷ལ་འ༷བྱོར་གྱི་གན༷ས་བཅ༷ས་པའམ་བཟུང་ཞིང་ཞེས་སོ། །སྒྲུབ་བྱེད་ཀྱི་ཐབས་ཤེས་པའི་ཤེ༷ས་ར༷བ་ཅ༷ན་སྒྲུབ་པོ་དེས། བདེ༷་བར་གཤེ༷གས་པ་ཉིད་རང་གི་མདུ༷ན་དུ་བས༷མ་ན༷ས་ནི༷། བཟླས་པ་སོགས་ལས་ཀྱི་སྦྱོར་བ་ཐམས་ཅད་བཅོམ་ལྡན་འདས་ཀྱི་སྤྱན་སྔར་བྱའོ། །དེའི་རྗེས་སུའམ་ཕྱི༷་ནས༷་བདག་གི་དེ་ཁོ་ན་ཉིད་མིག་སོགས་ཡ༷ན་ལ༷ག་གི་ཆོས་སུ་གདགས་པ་ཀུན་ལས་རྣ༷མ་པར་གྲོལ༷་བའི༷་ཕྱིར་ན་དེ་ཉིད་ཡུལ་གཟུགས་སུ་མི༷་འབྱེ༷ད་པའམ་མི་དམིགས་ཤིང་། ཡུལ་ཅན་བློས་གཟུགས་སོགས་ཆོས་སུ་འཛིན་པའམ་འབྱེ༷ད་པའི༷་རྣ༷མ་པ༷་སྤང༷ས་ཏེ་གཟུང་འཛིན་མེད་པ་འཇིག་རྟེན་པའི་ཤེས་པ་ཡུལ་མིན་པ་ཕྲ༷་ལ༷་རྟོགས་དཀའ་བ་སྟེ་རྣམ་པར་ཤེས་པའི་ངོ་བོ་ཙམ་དུའང་མི་དམིགས་པ། སྤྲོས་པ་དང་བྲལ་བ་རང་བཞིན་འོད་གསལ་བ་དོན་དམ་བྱང་ཆུབ་སེམས་གྱི་རང་
9-4-10b
བཞིན་སོ་སོ་རང་རིག་པའི་ཤེས་རབ་ཀྱིས་རྟོགས་ནས་དེའི་ངང་དུ་མཉམ་པར་བཞག་སྟེ། རྒོད་པ་སོགས་ཀྱིས་མི༷་གཡོ༷་བར་གནས་ཀྱང་། རྨུག་པ་སོགས་དང་བྲལ་བས་གས༷ལ་བ༷་སྟེ༷་མཚན་ཉིད་དྲུག་ལྡན་དེ་ལྟ་བུའི་དོན་དེ་ནི། སྒྲུབ་པ་པོའི་བློ༷་ཡི༷་དཔྱོ༷ད་པ༷་སྟེ་སོ་སོ་རང་རིག་པའི་ཤེས་རབ་ཀྱི་མདུ༷ན་ན༷་གན༷ས་པ་རང་ཉམས་སུ་བསྟར་བའི། བད༷ག་གི་དེ་ཁོ་ན་ཉི༷ད་འདི༷་འདྲ༷ར་བློ་བཞ༷ག་ནས༷་ནི༷། དེའི་རྗེས་སུ་ལྷའི་དེ་ཁོ་ན་ཉིད་དམ་སྔ༷གས་ཀྱི༷་དེ་ཁོ་ན་ཉིད་ཀྱི་རྣམ༷་པ༷ར་ཤེ༷ས་པ༷ས་བསྒོ༷མ་པར་བྱ་བ་ནི་གོང་དུ་ལྷ་དྲུག་ཏུ་བསྟན་པ་བཞིན་ནོ། །དེ་ལྟར་ལྷར་སྣང་ལ་སེམས་བསྡ༷མས་ན༷ས་བཞག་པས་མཐར་རྩོལ་བ་མེད་པར་རྟོག་མེད་དུ་གསལ་བའི་ཏིང༷་ངེ༷་འཛི༷ན་ལ༷་གན༷ས་པར་འགྱུར་རོ་ཞེས་སོ། །སེམས་བསྡམ་པའི་ཚུལ་བཟླས་བརྗོད་ཀྱི་ཡན་ལག་དང་བཅས་པ་རྒྱས་པར་གསུངས་པ། སྲོ༷ག་རླུང་ད༷ང་རྩོལ༷་བ༷་དྲན་པ་སྟེ་དེ་གཉིས་ར༷བ་ཏུ༷་བསྡ༷མ་པ་ནི་སྲོག་རྩོལ་བསྡམ་པ་ཞེས་བྱ་བ་ཡིན་ལ། དེ་དང་ལྡན་པའི་སྒོ་ནས་བཟླས་བརྗོད་བྱའོ་ཞེས་སོ། །རྒྱུད་གཞན་རྣམ་སྣང་མངོན་བྱང་ལས་ཀྱང་། སྲོག་ཅེས་བྱ་བ་རླུང་དུ་བཤད། །རྩོལ་བ་དྲན་པ་ཞེས་བྱའོ། །དེ་གཉིས་བསྡམས་པར་བྱས་ནས་སུ། །བཟླས་བརྗོད་འབུམ་ཕྲག་གཅིག་བྱའོ། །ཞེས་གསུངས་པ་ལྟར་སྲོག་ནི་རྣམ་རྟོག་གཡོ་བའི་བཞོན་པ་རླུང་ཡིན་ཏེ། འདི་ལྟར་མིག་དང་རྣ་བ་སོགས་དབང་པོའི་སྒོ་དང་། མཚན་མ་དང་བུ་ག་སྐྲ་དང་བ་སྤུའི་མཐར་ཐུག་པར་རྒྱུ་བ་རྣམས་རུས་སྦལ་གྱི་ལུས་བསྐུམ་ཞིང་། ལྕེ་ཡིས་ཆུ་འཇིབ་
9-4-11a
པའི་ཚུལ་ལྟར་ནང་དུ་བསྡུས་ཏེ་ང་འབྱིན་འཇུག་དེ་དག་རང་སར་དགག་པ་དང་། རྩོལ་བ་ནི་སྐབས་འདིར་དྲན་པ་སྟེ་སེམས་ཀྱི་འབད་རྩོལ་སྣ་ཚོགས་གཡོ་བ་དེ་ཉིད་བཀག་ནས་གང་ལ་དམིགས་པ་དེ་ཉིད་ལས་གཞན་དུ་མི་གཡོ་བར་བསྡམ་པར་བྱ་བ་སྟེ། དེ་ལྟ་བུའི་ཕྱིར་སྲོག་རྩོལ་བསྡམ་པ་ཞེས་བྱའོ། །སྐབས་གཞན་དུ་སྲོག་ཏེ་རླུང་གི་གཡོ་བ་རྩོལ་བས་བཀག་པ་དང་། རླུང་རང་གནས་སུ་བཅིངས་བས་འཆི་བ་མེད་པའི་སྲོག་རྩོལ་སྡོམ་བར་བྱེད་པ་ལ་སྲོག་རྩོལ་དུ་བཤད་པ་ཡོད་ཀྱང་། སྐབས་འདིར་གོང་ལྟར་ཤེས་པར་བྱའོ། །ཚུལ་དེ་དང་ལྡན་པའི་སྒོ་ནས་བཟླས་བརྗོད་ཀྱི་དེ་ཁོ་ན་ཉིད་བཤད་པ། སྔགས་ཀྱི་ཡི་གེའི་ཕྲེང་བའི་སྒྲ་ད༷ང་། བྱང་ཆུབ་སེ༷མས་ཀྱི་ངོ་བོ་ཟླ་བའི་དཀྱིལ་འཁོར་རྣམ་པར་དག་པ་ད༷ང་། གཞི༷་དང་པོ་མདུན་གྱི་དེ་བཞིན་གཤེགས་པའི་སྐུ་ལ༷་དམིགས་པ་གཞོ༷ལ་བ་དང་དེ་བརྟན་པར་གྱུར་པ་ན་ག༷སང་སྔ༷གས་མི༷་འགྱུར༷་བའི་གཞི༷་ཞེས་བྱ་སྟེ། གཞི་གཞན་ལ༷འང་བརྟན་པར་གྱུར་ནས་གསང་སྔགས་མི་འགྱུར་བའི་གཞི་ཞེས་སྦྱར་ཏེ་ཤེས་པར་བྱའོ། །ཡང་ན་གསང་སྔགས་མི་འགྱུར་བའི་གཞི་ཞེས་མར་སྦྱར་ནའང་རུང་སྟེ་གཞི་ཕྱི་མ་འདི་རང་ཉིད་ལྷའི་རྣམ་པར་བསྒོམ་པ་ཡིན་ལ། བདག་གི་དེ་ཁོ་ན་ཉིད་ཀྱང་དེ་ཡིན་ནོ། །གསང་སྔགས་མི་འགྱུར་ཞེས་བར་གྱི་གསལ་བྱེད་ཀྱི་ཚིག་དེ་དོན་ལ་ཡན་ལག་བཞི་པོ་དུས་གཅིག་གསལ་ཞིང་བརྟན་པར་གྱུར་པ་ལ་གསང་སྔགས་མི་འགྱུར་བའི་གཞི་ཞེས་བཤད་དོ། །དེ་ལྟར་སྔགས་ཀྱི་སྒྲ་
9-4-11b
དང་། བྱང་ཆུབ་སེམས་ཟླ་དཀྱིལ་དང་། བདག་མདུན་ལྷའི་རྣམ་པར་བསྒོམ་པའི་གཞི་གཉིས་ཏེ་ཡ༷ན་ལ༷ག་བཞི་པོ་དེ་དང་ལྡན་ན་ཡན་ལག་མ༷་ཉམ༷ས་པའི་བཟླས་བརྗོད་ཀྱི་དེ་ཁོ་ན་ཉིད་ཡིན་པས། དེ་ལྟ་བུའི་ཚུལ་དུ་གས༷ང་སྔ༷གས་ཉིད་ཡིད་བཟླས༷་སམ་ཤུབ་བུར་ཅི་ནུས་སུ་བཟླ་བ་བྱ་དགོས་སོ། །དེ་ཡང་རྣམ་སྣང་མངོན་བྱང་ལས། ཡི་གེ་དང་ནི་ཡི་གེ་སྦྱར། །དེ་བཞིན་གཞི་ལས་གཞིར་གྱུར་པ། །ཤིན་ཏུ་བསྡམ་པའི་ཡིད་ལ་ནི། །བཟླས་བརྗོད་འབུམ་ཕྲག་གཅིག་བྱའོ། །ཡི་གེ་བྱང་ཆུབ་སེམས་ཡིན་ཏེ། །གཉིས་པ་སྒྲ་ཞེས་བྱ་བ་ཡིན། །གཞི་ནི་རང་གི་ལྷ་གཞག་པ། །རང་གི་ལུས་ཀྱི་གནས་ལ་བྱ། །གཞི་གཉིས་པ་ནི་རྫོགས་སངས་རྒྱས། །རྐང་གཉིས་མཆོག་ཏུ་ཤེས་པར་བྱ། །ཟླ་བའི་དཀྱིལ་འཁོར་རྣམ་དག་པ། །སྔགས་པས་དེ་ལ་གནས་པར་བསམ། །ཡི་གེ་རྣམས་ནི་གོ་རིམ་བཞིན། །དེ་ཡི་དབུས་སུ་ལེགས་པར་དགོད། །སླར་སྡུད་པ་ཡི་ཚིག་གིས་ནོན། །སྲོག་དང་རྩོལ་བ་རྣམ་པར་སྦྱངས། །ཞེས་གསུངས་པ་ལྟར་རྒྱུད་དག་ལས་སྔར། ངག་གི་བཟླས་བརྗོད་མེད་པར་བསམ་གཏན་གྱི་སྒོ་ནས་སྔགས་འགྲུབ་པ་དང་། རྣལ་འབྱོར་ཐར་བ་ཐོབ་པར་གསུངས་ན་ཡང་། ཡན་ལག་གང་ལ་དམིགས་ནས་བཟླས་བརྗོད་བྱ་བ་དང་། ཡིད་བཟླས་དང་ཤུབ་བཟླས་བྱེད་ཚུལ་སོགས་གསལ་པོར་མ་བསྟན་པ་རྒྱུད་འདིར་གསལ་བར་བསྟན་པའི་ཕྱིར་བསམ་གཏན་གྱི་ཕྱི་མ་ཞེས་མཚན་དུ་ཐོགས་པའང་ཡིན་ནོ། །དེ་ཡང་རང་ལྷའི་རྣལ་འབྱོར་དུ་གསལ་བའི་ཟློ་བ་པོས་རང་གི་མདུན་དུ་བཞུགས་
9-4-12a
པའི་དེ་བཞིན་གཤེགས་པའི་ཐུགས་ཀར་བྱང་ཆུབ་སེམས་ཀྱི་རང་བཞིན་ཟླ་བའི་དཀྱིལ་འཁོར་རྣམ་པར་དག་པ་ལ་བཀོད་པའི་གསང་སྔགས་ཀྱི་ཡི་གེའི་ཕྲེང་བ་ལ་དམིགས་ནས་སྲོག་རྩོལ་བསྡམ་ཏེ་བཟླ་བར་བྱ་བ་ཡིན་ནོ། །དེ་ལྟར་སྒྲ་དང་སེམས་དང་བདག་དང་ལྷའི་གཞི་བཞི་པོ་འདི་ནི་དངོས་གྲུབ་འབྱུང་བའི་གཞི་ཡིན་པས་གཞི་བཞི་ཞེས་བྱ་ལ། བདག་གི་གཞི་ལ་གཞི་ཞེས་བརྗོད་པ་ནི་སེམས་དང་སེམས་བྱུང་སོགས་ཕུང་པོའི་ཆོས་འདི་དག་སེམས་ཅན་ཕལ་པ་རྣམས་ཀྱིས་བདག་དང་གཞན་དུ་རྟོག་པའི་གཞི་ཡིན་ལ། འདིར་བདག་གཞན་ལྷའི་ངོ་བོས་དངོས་གྲུབ་འབྱུང་བའི་གཞི་ཉིད་དུ་གྱུར་པ་ལ་བྱའོ། །འདི་བཞི་དང་ལྡན་པའི་ཏིང་ངེ་འཛིན་དང་མ་བྲལ་ན་སྔགས་ཀྱི་ཡན་ལག་མ་ཉམས་ལ། བྲལ་ན་ཉམས་པ་ཡིན་ནོ། །ཡན་ལག་སྔ་མ་གསུམ་མདུན་གྱི་ལྷའི་གཞིར་བསྒོམ་པའི་དམིགས་པ་མ་བཏང་བ་དང་། བདག་གི་གཞི་ལ་ང་རྒྱལ་མ་བཏང་བར་གཞི་བཞི་དུས་གཅིག་གསལ་བའི་ངང་དུ་གནས་པར་བྱ་ཞེས་གསུངས། །གལ་ཏེ་ང༷ལ་བར་གྱུར་ན༷་བདག་དང་མདུན་གྱི་ལྷ་དང་སྔགས་ཀྱི་དམིགས་པ་བཏང་སྟེ། བདག་གི་ལུས་ཐ་མལ་བར་བསམ་པས་ལྡང་ལ༷་ངལ༷་སོས༷་པར་གྱིས་ཤི༷ག ཅེས་གསུངས་ཏེ། དམིགས་པ་གཏོང་ཚུལ་ནི། མདུན་གྱི་ཡི་གེའི་ཡིག་འབྲུའི་དབྱིབས་ལ་སེམས་པས། སྒྲ་གདངས་ལ་དམིགས་པ་བཏང་ངོ་། །ཡི་གེའི་དམིགས་པ་བཏང་སྟེ་ཟླ་དཀྱིལ་ཙམ་དང་། དེ་བཏང་སྟེ་དེ་བཞིན་གཤེགས་པའི་སྐུ་ཙམ་དང་། དེ་བཏང་སྟེ་རང་ལྷའི་སྐུར་གསལ་བ་
9-4-12b
དེའི་ཐུགས་ཀའི་སྒྲ་དང་ཡིག་འབྲུ་དང་ཟླ་བ་དང་ལྷ་སྐུ་དང་། རྣམ་པར་མི་རྟོག་པའི་ངོ་བོ་ཡེ་ཤེས་ཀྱི་སྐུ་དང་། མཚན་མ་མེད་པ་ཆོས་ཀྱི་སྐུ་ཆོས་ཀྱི་དབྱིངས་དམིགས་པ་མེད་པ་ལ་རིམ་བཞིན་དམིགས་པས་སྔ་མ་སྔ་མ་བཏང་སྟེ་སྤྲོས་པ་དང་བྲལ་བའི་ངང་དུ་དར་གཅིག་བཞག་ལ། དེའི་ངང་ལས་བདག་ཐ་མལ་བ་རྣམ་སྨིན་གྱི་ལུས་སུ་གནས་པའི་རྣམ་པར་ལྡང་ལ་སྒྱུ་མ་ལ་སོགས་པའི་ཚུལ་དུ་ལྟ་ཞིང་ངལ་བསོ་བར་བྱའོ། །མདོར་ན་ཇི་སྲིད་བཟླས་པ་བྱེད་པ་དེ་སྲིད་དུ། བསམ་གཏན་དང་ལྡན་པར་བཟླ་དགོས་པས། ཡིད་རྣམ་པར་མི་རྟོག་པའི་བདག་ཉིད་བྱང་ཆུབ་ཀྱི་སེམས་ཟླ་བ་དྲི་མ་མེད་པའི་དཀྱིལ་འཁོར་དུ་སྣང་བ་ལ་དམིགས་པ་ཤིན་ཏུ་གོམས་པའི་གསལ་སྣང་སྐྱེ་ཞིང་མི་གཡོ་མི༷་འགྱུར༷་བ༷་དེ་ནི༷་གསང་སྔགས་ཀྱི་ཕྲེང་བའི་ཡི༷་གེ༷ར་ལྡ༷ན་པ་བསྒོམ་པ་དེ་ཉིད། དངོས་གྲུབ་སྩོལ་བའི་གཞི༷་མདུན་དུ་བསྒོམ་པའི་སངས་རྒྱས་ཀྱི་སྐུ་ཉིད་ཀྱི་ཐུགས་ཀར་བསྒོམ་པ་ལ༷ས་དངོས་གྲུབ་ནོད་པའི་གཞི༷་གྱུར༷་པ་བདག་ལྷའི་སྐུར་བསྒོམ་པའི་ཐུགས་ཀར་ཡང་དེ༷་བཞི༷ན་དུ་བསྒོམ་པ་ཡིན་ཏེ༷། རང༷་གི་ལྷའི་གསང་སྔག༷ས་ཀྱི་ཕྲེང་བ་དེ་དག་གང་དུ་གནས་ཤིང་འགོད་པའི་གཞི་ཉིད་ཀྱི་ཕྱིར༷་དུ་ནི༷་ཟླ་བའི་དཀྱིལ་འཁོར་གྱི་རྣམ་པ་ག༷ང་དུ་བརྟག༷་པ༷་ཡི༷ད་ཀྱི༷་རང་བཞིན་རྣམ་པར་ད༷ག་པ༷་བྱང་ཆུབ་སེམས་ཀྱི་བདག་ཉིད་ཅན་དེ་ནི་ནན་ཏན་དུ་བས༷མ་པ༷ར་བྱའོ༷་ཞེས་ཚིགས་བཅད་འདིས་བདག་མདུན་གཉིས་ཀའི་ཐུགས་ཀར་ཟླ་བ་དང་སྔགས་ཕྲེང་འགོད་པ་ལ་དམིགས་པར་བསྟན་ཏོ། །དེ་ཡང་མ་ཡེངས་པར་ནན་ཏན་དུ་བྱ་དགོས་པས་མིག་སོགས་
9-4-13a
དབང་པོའི་སྒོ་ནས་རྒྱུ་བའི་རླུང་ཐམས་ཅད། རང་གི་ལུས་ཀྱི་ནང་དུ་སླ༷ར་སྡུ༷ད་པ༷་ཡི༷ས་ཕྱིར་མི་འཕྲོ་ཞིང་མི་གཡོ་བར་བཀུག༷་ན༷ས་ནི༷། སྲོ༷ག་རླུང་ད༷ང་རྩོ༷ལ་བ༷་ཡིད་ཀྱི་འགྱུ་དྲན་གཉིས་ཀ་མི་འཕོ་བར་གཅིག་ཏུ་བསྡ༷མ་པ༷འི་ཡི༷ད་ནི། གས༷ང་སྔ༷གས་ཀྱི་ཚུལ་ཤེས་ཤིང་རི༷ག་པ༷ས་སྔ༷གས་ཀྱི་ཡི་གེ་ལ༷་དམིགས་པ་མ་ཡེངས་པར་སྦྱར༷་བར་བྱ་སྟེ། དེ་ལྟར་འབྱུང་འཇུག་གི་རླུང་དང་དབང་པོའི་བྱེད་པ་དང་སེམས་ཀྱི་དྲན་རྩོལ་སྣ་ཚོགས་རྩེ་གཅིག་མི་འཕྲོ་བར་བསྡམ་པ་དེ་ལ། ངག་ཏུ་བ༷རྗོད་པ་དབྱངས་ཀྱི་བཟླས་པ་མི་འོངས་པས། ཡི༷ད་ཀྱི༷་བཟླ༷ས་བརྗོ༷ད་འབའ་ཞིག་བརྩམ༷་པ༷ར་བྱའོ༷། །སྲོག་རྩོལ་བསྡམས་པ་སོགས་འདི༷་ཉི༷ད་ཀྱི༷་ནི༷་ཆོ༷་ག༷་དང་མ་བྲལ་བ་ཡི༷ས། ཡ༷ང་ན༷་ཅུང་ཟད་ལྷོད་པའི་ཚུལ་དུ་ཤུ༷བ་བུ༷ར་བཟླ་བ་བྱ༷་ཡ༷ང་རུང༷་མོད་དེ། འོན་ཀྱང་ཡིད་བཟླས་ནི་མཆོག་ཡིན་ནོ། །དེ་ཕྱིར་སྔ༷གས་རི༷ག་དངོ༷ས་གྲུབ༷་འདོ༷ད་པ༷་ཡི༷ས། བཤད་མ་ཐག་པའི་ཚུལ་དེ་ལས་ངག་ཏུ་བརྗོད་པའི་བཟླ༷ས་བརྗོ༷ད་གཞ༷ན་དུ༷་མི༷་བྱ༷འོ༷། །མདོར་ན་སྲོག་རྩོལ་བསྡམས་ཤིང་དབང་པོའི་སྒོ་ནས་ཤེས་པ་ཡན་པར་མི་བཏང་བར། མིག་ཟིམ་བུ་ལྟ་སྟངས་ཅུང་ཟད་ལྷོད་དེ་མདུན་གྱི་གཞི་སོགས་གསུམ་ལ་རྩེ་གཅིག་དམིགས། བར་བར་སྣའི་རླུང་གཏོང་བ་ན་རང་ལུས་ལྷ་ཉིད་དུ་བལྟ། ཇི་སྲིད་བཟླས་པ་གྲོལ་གྱི་བར་དེ་ལྟར་བྱ་ཞིང་། རླུང་ཕྱིར་འབྱིན་ཚེ་མདུན་གྱི་ལྷ་ཡི་ཐུགས་ཀར་ཟླ་བ་དང་སྔགས་ཕྲེང་བཅས་པ་མི་འགྱུར་བ་ལ་དམིགས། ནང་དུ་རྔུབ་ཚེ་བདག་གི་དེ་གསུམ་ལ་དམིགས་པ་གཙོ་ཆེར་བྱ་བ་རེས་མོས་བྱ་ཞིང་། དེ་ལྟ་བུའི་ངང་དུ་གནས་པ་ལ་ཡིད་ཀྱི་དག་པ་ཞེས་བྱ་སྟེ། ཆགས་
9-4-13b
སོགས་ཉོན་མོངས་པ་མ་ལང་བའི་དག་པ་དང་། དམིགས་ཡུལ་གསལ་ལ་ནག་ནོག་མེད་པས་ན་དག་པ་དེ་ལྟ་བུ་ལ་མཉམ་པར་བཞག་པར་བྱ་ཞིང་། བཟླས་པ་གཏོང་ཚེ་བདག་ལ་ངལ་གསོ་བ་སྔར་བཤད་པ་བཞིན་བྱའོ། །མདུན་གྱི་ལྷ་དེ་རང་གི་ཚད་ལས་ཅུང་མཐོ་བར་བསམ་ཞེས་སློབ་དཔོན་ཆེན་པོ་སངས་རྒྱས་གསང་བས་གསུངས་སོ། །
总结
གཉིས་པ་དོན་བསྡུ་བ། རིག་སྔགས་དེ་ཉིད་མ་ལུས་དང་སོགས་ཚིགས་བཅད་གཅིག་གིས་བསྟན་ཏེ། རི༷ག་སྔ༷གས་ཀྱི་དེ༷་ཁོ་ན་ཉི༷ད་ལྷ་དྲུག་གི་ཚུལ་དུ་བསྒོམ་པའི་རིམ་པ་མ༷་ལུས༷་ད༷ང་། བད༷ག་གི༷་དེ༷་ཁོ་ན་ཉི༷ད་རང་བཞིན་མ་གྲུབ་ལ་སྣང་ཙམ་ལྷ་ཡི་སྐུ་རང་རིག་འོད་གསལ་གྱི་ངོ་བོ་ཅན་དུ་བསྒོམ་པའི་ཆོ༷་ག༷་ད༷ང་། བཟླས༷་བརྗོ༷ད་ཀྱི་དེ༷་ཁོ་ན་ཉི༷ད་ཡན་ལག་བཞི་དང་ལྡན་པ། མཆོ༷ག་གི་དོན་དེ་དེ་ཉིད་རྣམ་པ་གསུམ་པོ་འདི་ལེགས་པར་ཤེ༷ས་ན༷། སྔགས་སྒྲུབ་པར་བྱེད་པའི་མི༷ས་ནི༷་དངོ༷ས་གྲུ༷བ་ཐོ༷བ་པ༷ར་འགྱུར་བ་ལ་སོམ་ཉི་མེད་དོ། །
持诵真如各别说
གཉིས་པ་བཟླས་བརྗོད་ཀྱི་ཡན་ལག་བྱེ་བྲག་ཏུ་བཤད་པ་ལ། བཟླས་བརྗོད་ཀྱི་དེ་ཉིད་གསུམ་བཤད་པ་དང་། རིག་སྔགས་ཉེ་བ་སོགས་ཀྱི་ཚུལ་བཤད་པ་གཉིས།
说持咒三要
དང་པོ་ལ། བཟླས་པ་བྱེད་པའི་གནས་བསྟན་པ་དང་། བཟླས་པའི་བསམ་གཏན་གྱི་མན་ངག་དེ་ཉིད་གསུམ་བཤད་པ་གཉིས། དང་པོ། དབེན་པའི་སྐྱེད་མོས་ཚལ་སོགས་ཚིགས་བཅད་གཅིག་གིས་བསྟན་ཏེ། བཟླས་པ་བྱེད་པའི་གནས་ནི་སྐྱེ་བོས་དབེ༷ན་པ༷འི་སྐྱེད༷་མོ༷ས་ཚལ༷་ད༷ང་ཆུ་བོའི་ངོ༷གས། རི་ཡི་ཕུག༷་ད༷ང་རི༷་བོ༷ར་དང་ན༷གས༷་ཚ༷ལ་སོགས་མཚན་ཉིད་ལྡན་པའི་གནས་གང༷་དུ། རབ་ཏུ་བྱུང་བ་དང་རིག་
9-4-14a
སྔགས་ཀྱི་བརྟུལ༷་ཞུ༷གས་ལ་ག༷ནས་ས༷མ། གསོ་སྦྱོང་སོགས་སྡོ༷མ་པ༷་ཡི༷ས་རྒྱུད་བསྡམ་པའི་སྔ༷གས་སྒྲུབ་པ༷་པོ་བཟླས་བརྗོད་ཀྱི་བས༷མ་གཏན༷་བྱེ༷ད་ཅིང༷་གན༷ས་པར་བྱའོ། །གཉིས་པ་ལ་ལམ་དངོས་དང་། དེའི་ཡན་ལག་བཤད་པ་གཉིས། དང་པོ་ལ། མདོར་བསྟན་རྒྱས་བཤད་གཉིས། དང་པོ། གསང་སྔགས་མེར་གནས་སོགས་ཚིགས་བཅད་གཅིག་གིས་བསྟན་ཏེ། སྔགས་ངག་ཏུ་བརྗོད་པའི་བཟླས་པ་མེད་པར་བསམ་གཏན་གྱི་སྒོ་ནས་གྲུབ་ཚུལ་གསུངས་པ། གས༷ང་སྔ༷གས་མེ༷ར་གན༷ས་པ་བསྒོམ་པས་འདོད་པའི་དངོ༷ས་གྲུ༷བ་སྟེར༷་བ་དང་སྒྲ༷་ག༷ནས་ཀྱིས། ཏིང་ངེ་འཛིན་གྱི་རྣལ་འ༷བྱོར་སྟེར༷་བ༷ར་དྲ༷ན་ཏེ་འདི་གཉིས་མངོན་པར་འདོད་པའི་དངོས་གྲུབ་འགྲུབ་པའི་ཐབས་ཁྱད་ཅན་ཡིན་ལ། སྒྲ༷་མཐ༷ར་དམིགས་ན་ཐ༷ར་བ༷་སྟེར༷་བ༷་ཉི༷ད་དེ། འདི༷་ད༷ག་ནི་སྔགས་བཟླ་བའི་བསམ་གཏན་གྱི་དེ༷་ཉི༷ད་གསུམ༷་པོ༷་ཞེས་བྱ་བ་ཡི༷ན་ནོ། །གཉིས་པ་རྒྱས་བཤད་ལ་ནང་གི་དབྱེ་བ་སོ་སོ་ཡོད་ཀྱང་སྤྱིར་བསྡོམ་སྟེ། མི་འབྱེད་ལས་བྱུང་ཞེས་པ་ནས། བློ་གྲོས་ཞི་བ་བརྟན་པར་སྤྱད། །ཅེས་པའི་བར་གྱིས་བསྟན་ཏེ། དབང་ཤེས་ཀྱིས་མི༷་འབྱེ༷ད་པ་ཡིད་དེ། དེ་ལ༷ས་བྱུང་བ་སེམས་དང་སེམས་བྱུང༷་གི་དངོ༷ས་པོ༷་རྣ༷མས། བློ༷་གྲོས་ཅ༷ན་གྱིས༷་ནི༷་བད༷ག་གི་དེ་ཁོ་ན་ཉིད་གཉིས་སུ་མེད་པ་ལའམ། དེ་ལྟར་མིན་ནའང་ནང་དུའང་ཡིད་ཉིད་ལ༷་བསྡུས་ཏེ་བསྡ༷མས་པས་ཀུན་ནས་དཀྲིས་པ་མི་འབྱུང་བའོ། །དེ་ནས་སྔ༷གས་པ༷་དེ་བདག་གཉིས་ཀྱི་སྤྲོས་པའི་ཡ༷ན་ལ༷ག་ཀུན་ལས་འ༷དས་པ་སྣང་བ་མེད་པའི་ཡེ་ཤེས་ལ༷་
9-4-14b
གན༷ས་པར་བྱས་ནས། བསམ་གཏན་གྱི་སྤྱོད་ཡུལ་གང་ལའང་ཞེ༷ན་པ༷་མེ༷ད་པ༷ར་བས༷མ་པའམ་བསྒོམ་པ༷ར་བྱའོ༷། །འདི་ནི་བསྒོམ་པ་རྣམས་ཀྱི་སྔོན་དུ་འགྲོ་བ་དང་། གནས་སྐབས་ཀུན་ཏུ་ཡང་འཇུག་པ་ཡིན་ནོ། །དེ་ལ་སྒྲ་གནས་ཞེས་པ་ལ་སོགས་པ་གསུམ་པོ་དེ་ཅི་ལྟ་བུ་ཞེ་ན། བཤད་པ། སྒྲ༷་ཞེ༷ས་བྱ༷་བ༷་ནི་སྔགས་ཀྱི་ཡི་གེ་ཕྲེང༷་བ༷ར་སྦྱར༷་བ་ཡི་སྒྲ་གདངས་རྟོག་ངོར་སྣང་བ་དེ་ཡིན་ལ། སྔགས་ཀྱི་ཡི༷་གེ༷་རྣམས་བརྒྱུས༷་ལ༷་སྟེ་གཅིག་གི་རྗེས་སུ་གཅིག་འབྲེལ་ཞིང་། མི༷་འགྱུར༷་བ་རྣམ༷ས་ཞེས་པ་བར་མ་ཆད་པར་གསལ་སྣང་བརྟན་པའོ། །དེ་དཔེར་ན་དྲི༷ལ་བུའི༷་སྒྲ༷་བཞི༷ན་བར་མ༷་ཆ༷ད་པ༷ར་བརྒྱུད་མར་སྔགས་ཀྱི་ཡི་གེའི་སྒྲ་གདངས་འབྱུང་བ་ལ་སེམས་གཏད་ནས། སྔགས་ཀྱི་སྒྲ་དེ་ལྷའི་ངོ་བོར་ཤེས་པར་བྱ་ཞིང་། སྔགས་ཀྱི་སྒྲ་གདངས་ཡིད་ངོར་སྣང་བ་དེ་ཡི༷ད་ལ༷་ཞེ༷ན་པ༷ར་གྱུར་པའི་ཚུལ་གྱིས་སེ༷མས་པ༷་ན༷། སྒྲ་གནས་ཀྱི་བསམ་གཏན་ཞེས་བྱའོ༷། །མེར་གནས་ནི་ཐུགས་ཀར་མེ༷་ཡི༷་ན༷ང་ན༷ས་སྔགས་ཀྱི་སྒྲ་དེ་འབྱུང་ཞིང་། མེ་དེས་སྔགས་འབྲུ་ལ་གནོད་པ་སོགས་མེ༷ད་པར་ཞི༷་བ༷་སྟེ༷། སྔགས་འབྲུའི་ཚི༷ག་རྣ༷མས་ཆད་ལྷག་མེད་པར་ད༷ག་པ༷་དང་། སོ་སོའི་རང་སྒྲ་གསལ་བར་ཟུར་ཕྱིན་པའི་ཡ༷ན་ལ༷ག་དང་ལྡ༷ན་པ་དེ་ལྟ་བུ། སྲོ༷ག་ད༷ང་རྩོལ༷་བ༷འ༷ང་ནང་དུ་བསྡུས་ཏེ་བདག་གི་དེ་ཁོ་ན་ཉིད་དུ་བཀ༷ག་པ༷འི་བད༷ག་ཉིད་དུ་གྱུར་པའི་རྣལ་འབྱོར་པས། གཉིད་སོགས་ཞུམ་རྨུགས་སྤང༷ས་ན༷ས་ནི༷་རྩེ་གཅིག་ཏུ་རྣ༷མ་པ༷ར་བས༷མ་པར་བྱའོ། །སླར་ཡང་དེའི་ཚུལ་གསལ་བར་གསུངས་པ། བདག་གི་
9-4-15a
སྙིང༷་ག༷ར་གན༷ས་པ༷འི་ཕྲ༷་བ༷་ནི༷། ཞེས་རྣམ་པར་མི་རྟོག་པའི་གཟུགས་བརྙན་ཐོག་རེག་མེད་ཅིང་གོ་མ་རྡུག་པའི་ཕྱིར་རགས་པའི་གདོས་པ་མེད་པས་སོ། །དེ་གང་ཞེ་ན། དྭང་ཞིང་འོད་གསལ་བ་དྲི༷་མེ༷ད་ཟླ་བ༷འི་དཀྱིལ༷་འཁོ༷ར༷་ཏེ། ཟླ་དཀྱིལ་དེ༷་ཡི་ན༷ང་ན་མི་གནོད་ཅིང་ཟུག་རྔུ་མེད་ལ་ཡིད་དུ་འོང་བའི་རང་བཞིན་ཅན་ཡིན་པས་ན་ར༷བ་ཏུ༷་ཞི༷་བ༷་ཡི༷་མེ༷་ལྕེ༷་ར༷བ་ཏུ༷་འོ༷ད་བཟ༷ང་བ༷་བསམས་ནས། མི༷་འགྱུར༷་བ་སྔགས་ཀྱི་ཡི་གེའི་གཞི༷་ཡིག་འབྲུ་རྣམས་ནི༷་དེ༷ར་བཞ༷ག་ནས༷། གཡེང་བ་སོགས་ཀྱིས་སྐྱོན་མེད་པར་བདེ༷་བར༷་འདུ༷ག་ན༷ས། མེ་ལ་གནས་པའི་སྔགས་ཀྱི་སྒྲ༷་གདངས་བས༷མ་པར་བྱ་ཞེས་སོ། །མམ༷་ཞེས་པ་འདམ་ངའི་དོན་ཏེ། དེ་ལྟར་མེ་ཡི་ནང་ན་གནས་པའི་སྔགས་ཀྱི་སྒྲ་གདངས་ཡིད་ཀྱིས་བསམས་ནས་ཡིད་བཟླས་བྱ་བའམ། ཡང་ན་ལྷའི་ཐུགས་ཀར་མི༷་འགྱུར༷་བ༷་བྱང་ཆུབ་སེམས་ཀྱི་ངོ་བོ་ཟླ་དཀྱིལ་ལ༷་སྔགས་ཀྱི་ཡི༷་གེ༷་བཞ༷ག་པ་ནི་གཟུགས་མི་སྒོམ་གྱི་སྔགས་ཀྱི་སྒྲ༷་ཉི༷ད་འབ༷འ་ཞི༷ག་བས༷མ་པ༷ར་བྱའོ༷། །ངག་ཏུ་བརྗོད་པ་མེད་པར་སྔགས་ཀྱི་སྒྲ༷་ལ༷་དམི༷གས་པ༷འི་བས༷མ་ག༷ཏན་ནི༷་འབ༷འ་ཞི༷ག་བྱས༷་པ༷་ཉི༷ད་ཀྱིས༷་ཀྱང༷་ལྷ་དང་མི་སོགས་བརྟན་གཡོའི་དངོ༷ས་པོ༷་ཀུན༷་ལ་གན༷ས་པ་ད༷མ་པ༷འི་དཔ༷ལ་ཏེ་དཔལ་བཟང་པོ་ཇི་སྙེད་ཡོད་པ་དེ་རྣམས།སྒྲུབ༷་པའི༷་སྐྱེས༷་བུ༷ས་མཚོན་པས་བུད་མེད་སོགས་གང་ཡིན་དེས་ཐོ༷བ་པ༷ར་འ༷གྱུ༷ར་རོ། །ཞེས་དངོས་གྲུབ་ཅི་འདོད་པ་འགྲུབ་ཅེས་པའི་ཐ་ཚིག་གོ། དེ་ལྟར་སྲོག་རྩོལ་བསྡམས་ཏེ་མེར་གནས་ཀྱི་བསམ་གཏན་བསྒོམས་པས་བཀྲེས་པས་མི་
9-4-15b
ཉེན་པ་སོགས་མཚན་མ་འབྱུང་ཞིང་ཤིན་ཏུ་སྦྱང་བ་ཐོབ་ནས་རང་གང་བསམ་གྱི་འབྲས་བུ་ཐོབ་པའི་བར་དུ་བརྩོན་པར་བྱའོ། །འདི་ལྟ་བུའི་བཟླས་བརྗོད་ཀྱི་བསམ་གཏན་ནི་ཁྱད་པར་འཕགས་པའི་མན་ངག་ཡིན་ཏེ། ཚུལ་འདི་དང་ལྡན་ན། སེམས་ཀྱི་བཞོན་པར་གྱུར་པའི་རྟ་དང་འདྲ་བ་རླུང་དང་ཞོན་བྱེད་སེམས་གཉིས་ཀ་ལྷན་ཅིག་བཅིངས་པའི་སྲོག་རྩོལ་བསྡམས་པའི་བཟླས་པའི་ཏིང་འཛིན་ཁྱད་པར་ཅན་མྱུར་དུ་འགྲུབ་པ་དེ་ལྟ་བུ་བཟླས་པ་གཞན་གྱིས་མི་ནུས་ལ། ཡན་ལག་བཞི་དང་ལྡན་པའི་བཟླས་བརྗོད་འདི་ལྷ་དང་སྔགས་དང་དེ་ཁོ་ན་ཉིད་ཀྱི་རྣམ་པ་ལམ་དུ་བྱེད་པའི་ཐབས་ཁྱད་པར་ཅན་ཡིན་པས་དངོས་གྲུབ་མྱུར་དུ་འཐོབ་ཅིང་ལམ་གྱི་རྟོགས་པ་མྱུར་དུ་སྐྱེད་པ་ཡིན་ཞིང་། མེར་གནས་པ་དང་སྒྲ་ཡི་བསམ་གཏན་དག་ཀྱང་སྔགས་ཀྱི་སྟོབས་བསྐྱེད་པ་ཡིན་པས་ཐུན་རྣམས་སུ་ཅི་རིགས་བྱའོ་ཞེས་གསུངས། གསུམ་པ་སྒྲ་མཐའི་བསམ་གཏན་ནི། སྒྲ་མཐའ་ཞེས་པ་སྒྲ་ཡལ་བ་སྟེ། ཡལ་བའི་གནས་ནི་རང་བཞིན་རྣལ་མ་ཆོས་སྐུའི་གནས་སོ། །དེ་ལ་གནས་དང་། དེ་མངོན་པར་བྱེད་པ་དང་། རང་བཞིན་ཡོངས་སུ་བཏང་བ་གསུམ་གྱིས་སྔགས་ཀྱི་སྒྲར་སྣང་བའི་རྟོག་པ་གཏོང་སྟེ། གནས་ནི་གཟུགས་ཀྱི་ཡན་ལག་གི་ཡིག་འབྲུར་དམིགས་པ་བཏང་བའོ། །མངོན་བྱེད་ནི་ཡིད་བཟླས་དང་ཤུབ་བཟླས་ཀྱི་སྒྲའོ། །རང་བཞིན་ནི་སྒྲར་སྣང་བ་བཏང་བའོ། །དེ་ལྟ་བུའི་དོན་དེ་ཉིད་བསྟན་པའི་ཕྱིར་གསུངས་པ། སྒྲའི་གནས་སུ་གྱུར་པའམ་བཟླས་བརྗོད་འབྱུང་བའི་གཞི་ལྟོས༷་པ་དང་
9-4-16a
བཅ༷ས་པའི་ཡ༷ན་ལ༷ག་ཏུ་གྱུར༷་པ༷ར་སྣང༷་བ། སྔགས་པའི་ལུས་ལྷར་བསྒོམ་པ་སོགས་ཀྱི་ལྟོས་བཅས་ཀྱི་རྩོལ་བ་ཐམས་ཅད་དང་། ཤུབ་བུར་བརྗོད་པའི་སྔགས་ཀྱི་སྒྲ༷་ཞེ༷ས་བྱ༷་བ༷་ད༷ང་། ཡི༷ད་ཀྱི༷་ངོར་སྣང་བའི་བཟླས་པ་ད༷ང་། སྔགས་ཀྱི༷་སྒྲར་སྣང་བའི་ཚི༷ག་རྣ༷མས་སྣང་མེད་ཆོས་ཀྱི་དབྱིངས་ལ་དམིགས་པ་བཏང་ནས་རྣམ་པར་ད༷ག་པ༷་ནི་རི༷ག་སྔ༷གས་དབ༷ང་པོ་སྟེ་སྔགས་ཀྱི་རྒྱལ་པོ་ཡིན་ལ། ཆོས་ཐམས་ཅད་ཀྱི་ཆོས་ཉིད་དམ་ཆོས་ཀྱི་དབྱིངས། སྤྲོས་པའི་མཚན་མའམ་ཡ༷ན་ལ༷ག་ཐམས་ཅད་སྤང༷ས་བ༷་འདི་ནི་སྔགས་སོགས་ཆོས་ཀུན་གྱི་དེ་ཁོ་ན་ཉིད་དུ། རྒྱལ༷་བ༷ས་མཁྱེན༷་ཅིང་ཐུགས་སུ་ཆུད་པའོ། །དེ་བསྒོམས་པས་སྒྲིབ་པ་གཉིས་ལས་གྲོལ་བར་བྱེད་དོ། །ལྟོས་བཅས་ཞེས་པའི་དོན་སླར་ཡང་བཤད་པ། སླ༷ར་སྡུད༷་པ་དང་། ད༷ཀའ་ཐུབ༷་དང་ཡན་ལག་བཞི་དང་ལྡན་པའི་བས༷མ་གཏ༷ན་ད༷ང་། སྲོ༷ག་རྩོལ༷་བསྡམ་པ་དང་། དཀྱིལ་འཁོར་འབྲི་བ་དང་མཆོད་པ་དང་སྦྱིན་སྲེག་སོགས་ཆོ༷་ག༷འི་བྱ་བ་ཐམས་ཅད་ད༷ང་། བདག་གི་དེ་ཉིད་གཏན་ལ་འབེབས་པའི་ཕྱིར་ཤེས་རབ་ཀྱིས་དཔྱད་པ་བྱེད་པ་སོགས། མདོར་ན་རྣ༷མ་པ༷ར་ཤེ༷ས་པ༷་སྣ༷་ཚོ༷གས་པ༷འི་རྩོལ་བ་ལ་གནས་པའི་སྔ༷གས་པ༷་རྣམས་ནི་རེ༷་ཞི༷ག་སྟེ་དེའི་ཚེ་དེའི་དུས་ན་ལྟོས༷་པ་དང་བཅ༷ས་པ༷འོ། །དེ་ལྟར་ལྟོས་བཅས་སམ་མཚན་བཅས་ཀྱི་རྣལ་འབྱོར་ལ་བརྩོན་པའི་ཚེ་ན་སྒོ་གསུམ་རབ་ཏུ་བསྡམ་པ་ཉོན་མོངས་པའི་གཉེན་པོའི་དཀའ་ཐུ༷བ་ཆེན༷་པོ༷་རྒྱུན་ཆགས་ཤིང་མ་ཉམས་པ་ད༷ང་ལྡན༷་པ༷ར་བྱས་ཏེ། བདག་གི་དེ་ཁོ་ན་ཉིད་ཕྱིན་ཅི་མ་ལོག་པར་རྟོགས་པའི་ཆོ༷ས་
9-4-16b
རང་རྒྱུད་ལ་བསྐྱེ༷ད་པའི་ཐབས་རིག་སྔགས་ཀྱི་བརྟུལ༷་ཞུག༷ས་མཆོག༷་དང་ལྡ༷ན་པ༷། སླར་སྡུད་པ་སོགས་སྔགས་ཀྱི་ཡན་ལག་ཐམས་ཅད་ལ་ལྟོས༷་པ་དང་བཅས༷་པ༷་ནི༷། གཟུགས་སོགས་ཕྱི་རོལ་ཡུ༷ལ་གྱི་འཆིང་བ་ལ༷ས་རྣམ་པར་གྲོ༷ལ་ཞིང་ལྷའི་བྱིན་གྱིས་བརླབས་ནས་སྔགས་གྲུབ་པར་འགྱུར་བས། ལྷ་སྐུའི་རྣམ་པའི་ཡ༷ན་ལ༷ག་གམ་ཆ་ཤས་སམ་སྤྲོས་པ་དང་བཅས་པའི་རྣམ་པར་སྣང༷་བ༷། མཚན་བཅས་ཀྱི་ཏིང་ངེ་འཛིན་ལ་ན༷ན་ཏན༷་དུ་འབད་པར་བྱའོ༷། །དེ་ལྟ་ནའང་མཚན་བཅས་ཀྱི་སྣང་བ་འདི་དག་རྣམ་པར་རྟོག་པ་དང་བཅས་པ་ཡང་དག་པའི་དོན་མི་གསལ་བའོ། །སྔགས་སྒྲུབ་པ་ལམ་ལ་བརྩོན་པ་དེས་མཆོག་འགྲུབ་པའི་སླད་དུ། ལྟོས་བཅས་ཀྱི་གནས་སྐབས་དེ༷ར་ཡ༷ང་བརྟུལ༷་ཞུག༷ས་ཏེ་ཡི་དམ་དུ་གོམས་པར་རེ་ཤིག་བྱས༷་ན༷ས་ནི༷་དྲོད་རྙེད་པ་ན། ཡང་དག་པའི་དོན་མི་གསལ་བ་སྤང་གཉེན་ནམ་བླང་བ་དང་དོར་བའི་གཉིས་འཛིན་གྱི་དབང་གིས། དོ༷གས་པ༷འི་འདུ་ཤེས་ཀྱི་བདག་ཉིད་ཅན་འཇི༷ག་རྟེན༷་པའི་ཆོས་ལས་མ་འདས་ཤིང་། འཇིག་རྟེན་ལས་འདས་པ་ཡང་དག་པའི་ཆོས་ལ་ལྟོས་ན་སྨད༷་པ༷་ཡི༷་བས༷མ་ག༷ཏན་འབའ་ཞིག་གམ་གཅི༷ག་པུ༷་ལ་མངོན་པར་ཞེན་ཞིང་རློམས་པ་དེ་ལྟ་བུ་ཡིད་ལ་མི་བྱེད་པའི་སྒོ་ནས་ར༷བ་ཏུ་བསྡ༷མས་པའམ་སྤངས་ནས༷། ཆོས་ཐམས་ཅད་རང་བཞིན་གྱིས་མ་སྐྱེས་མ་འགག་པ་མཐའ་བཞིའི་སྤྲོས་པ་དང་བྲལ་བའི་རྣམ་ཀུན་མཆོག་ལྡན་གྱི་སྟོང་ཉིད་ཆོས་ཀྱི་དབྱིངས་ལ་མཉམ་པར་བཞག་སྟེ་མཚན་མེད་ཀྱི་བསམ་གཏན་བྱེད་པ་ནི་བློ༷་གྲོ༷ས་ཞི་བ༷་ཞེས་བྱ་སྟེ། མཚན་འཛིན་གྱི་འདུ་ཤེས་སྣ་ཚོགས་
9-4-17a
དང་སྒྲིབ་གཉིས་ཀྱི་མུན་པ་ཞི་བ་རྣམ་པར་རྟོག་པ་ཐམས་ཅད་དང་བྲལ་བའི་འོད་གསལ་བ་ཡིན་པས། དེ་ལས་གཞན་དུ་མི་འགྱུར་བར་བརྟན༷་པ༷་ཉིད་སྤྱད༷་པར་བྱའོ། །ཞེས་འདིས་མཚན་མེད་ཀྱི་རྣལ་འབྱོར་བསྟན་ཏོ། །དེ་ལྟར་མཚན་བཅས་ཐབས་ཀྱི་རྣལ་འབྱོར་གྱིས་འོག་མིན་པའི་བར་གྱི་དངོས་གྲུབ་ཅི་འདོད་པ་བདེ་མྱུར་དུ་བསྒྲུབ་པའི་སྒོ་ནས་འཇིགས་པ་དང་སྡུག་བསྔལ་ལས་ཕྲལ་དུ་དབུགས་དབྱུང་ཞིང་བདེ་བའི་རྟེན་ལས་བྱང་ཆུབ་ཀྱི་རིགས་དང་ལྡན་པའི་སྒྲུབ་པ་པོ་སྐལ་པ་ཆེན་པོར་གྱུར་པ་དེས། མཚན་མེད་ཀྱི་རྣལ་འབྱོར་ལ་གོམས་པས་རྣམ་པར་གྲོལ་བ་མངོན་དུ་བྱེད་ཅིང་། ཡང་དག་པའི་དོན་དུ་མཚན་བཅས་དང་མཚན་མེད་ཀྱི་རྣལ་འབྱོར་ཟུང་དུ་ཞུགས་པ་རྣམ་པ་ཀུན་གྱི་མཆོག་དང་ལྡན་པའི་སྟོང་ཉིད་རང་བཞིན་འོད་གསལ་བའི་ཡེ་ཤེས་ཆེན་པོ་ལམ་དུ་བྱས་པ་ལ་བརྟེན་ནས་མི་གནས་པའི་འབྲས་བུ་སྐུ་གཉིས་ཟུང་འཇུག་གི་སངས་རྒྱས་ཉིད་མངོན་དུ་བྱེད་པར་འགྱུར་རོ། །གཉིས་པ་ལམ་གྱི་ཡན་ལག་ནི། ཁུ་བ་བཤང་གཅི་སོགས་ནས། །རབ་ཏུ་གསང་བ་གསུངས་པ་ཡིན། །ཞེས་པའི་བར་གྱིས་བསྟན་ཏེ། འདི་ལ་ནང་གསེས་སུ་གཙང་སྦྲ་བྱ་བ། གཞན་ལ་གནོད་པ་སྤང་བ། བརྟུལ་ཞུགས་མ་ཉམས་པར་བྱ་བ་གསུམ་གྱི་དང་པོ། སྔགས་འགྲུབ་པ་ནི་རྒྱུ་རྐྱེན་རྟེན་འབྲེལ་ལ་ལྟོས་པའི་ཕྱིར། སྔགས་བསྒྲུབ་པའི་ཡན་ལག་གི་སྤང་བླང་རྣམས་ཀྱང་མ་འཆོལ་བར་སྤྱད་དགོས་ཏེ། ཁུ༷་བ༷་འབྱིན་པ་དང་། བཤ༷ང་པ་དང་། གཅི༷་བ་འདོར་བ་ད༷ག་ད༷ང་ནི༷། བཟའ་བ་སོགས་མི་གཙང་བ་དང་འབ༷ག་པ༷་དག༷་དང་
9-4-17b
ནི༷་འོག་རླུང་རྒྱུ༷་བ༷་ལ༷འ༷ང་ལྷར་བསྒོམ་མ་བསྒོམ་གྱི་སྐབས་ཀུན་དུའང་སེམས་ཡན་པར་བྱས་ནས་བབ་བབ་དུ་མི་བྱ་བར་བག་ཡོད་པའམ། དོ༷གས་པ༷་ཡི༷་ནི༷་གཟུང༷ས་ཏེ་དྲན་ཤེས་མ་ཉམས་པ་རྒྱུན་ཆགས་པའི་སྒོ་དེ་ཉིད་ཀྱིས༷་ཀྱང༷་། དབེ༷ན་པ༷ར་གཙ༷ང་སྦྲ༷་ལ་གནས་པ་བརྩམ༷་པ༷ར་བྱ༷་སྟེ་གཙང་སྦྲ་མེད་པ་ནི་བྱ་རྒྱུད་ཀྱི་ཚུལ་དང་འགལ་བར་འགྱུར་རོ། །གཉིས་པ། ལམ་སྲ༷ང་ད༷ང་། ཁྲོ༷ན་པ༷་དང་། ཆུ་མིག་ལུ༷་མ༷་ད༷ང་། གྲོ༷ང་ད༷ང་གན༷ག་ལྷ༷ས་ད༷ག་ལ༷་ཡ༷ང་། ང༷ག་དང་ལུས༷་དང་ཡི༷ད་ཀྱི༷ས་སྤ༷ང་བ༷་ནི༷། སེ༷མས་ཅ༷ན་གནོ༷ད་པ༷་མི་དགེ་བཅུ་པོ་ཀུན༷་མི༷་སྤྱད༷་དེ་སྤྱད་ན་དེ་དག་སྔགས་འགྲུབ་པའི་འགལ་རྐྱེན་ཡིན་པས་སོ། །གསུམ་པ་སྔགས་འགྲུབ་པའི་མཐུན་རྐྱེན། མེར་གནས་སོགས་བས༷མ་ག༷ཏན་ད༷ང་ནི༷་ཡན་ལག་བཞི་ལྡན་གྱི་བཟླ༷ས་བརྗོ༷ད་ད༷ང་། གས༷ང་སྔ༷གས་འགྲུ༷བ་པ༷ར་བྱ༷་བ༷་ཡི་ཆེད་དུ་མཆོད་པ་དང་ཚོགས་བསགས་པ་སོགས་ད༷ང་། སྦྱིན༷་སྲེ༷ག་བྱ་བ་དང་དཀྱིལ་འཁོར་དུ་དབང་བསྐུར༷་བ་སོགས་ཀྱི་ལས་ཐ༷མས་ཅ༷ད་ད༷ང་། སྔགས་བསྒྲུབ་པའི་གནས་སམ་ཡུལ་བརྟག་པ་དང་། ས་བསླང་བ་དང་། བྱི་དོར་བྱ་ཚེ་ལྷའི་ང་རྒྱལ་བྱ་བ་སོགས་མདོར་ན་ཡུ༷ལ་གྱི༷་བྱ༷་བ༷་རྣ༷མས་ལ༷་ཡ༷ང་བརྟུ༷ལ་ཞུ༷གས་འདི་དང་འདི་ལྟ་བུ་དགོས་ཞེས་གསུང༷ས་པ༷་ག༷ང་ཡི༷ན་པ༷་དེ༷་ཡི༷་གན༷ས་གང་དུ་བྱ་བའམ་གནས་སྐབས་དང༷་། བཟླས་པའི་གྲངས་ལ་སོགས་པའི་ཚད༷་རྣ༷མས་ཀྱང༷་། སྔོ༷ན་གྱི་ཚེ་ན་ནི༷་བད༷ག་ཚངས་པ་ས་ཡི་མེ་ཏོག་ཉི༷ད་འབ༷འ་ཞི༷ག་ལ༷་མཐུ༷་སྟོབས་ཆེ༷ན་པོ༷་དཔལ་རྡོ༷་རྗེ༷་འཛི༷ན་གྱི༷་ལྷ༷ས། གཞན་ལ་ར༷བ་ཏུ་གས༷ང་བ༷་འདི་དག་ཞལ་ནས་དངོས་སུ་གསུང༷ས་ཤིང་གདམས་
9-4-18a
པ༷་ཡི༷ན་གྱི་རང་བཟོ་མ་ཡིན་ནོ། །ཞེས་སོ། །སྐབས་འདིར་ཡུལ་གྱི་བྱ་བའམ་གནས་ཀྱི་བྱ་བ་ཞེས་གསུངས་པ་འདི་སྡོད་གནས་ཁོ་ནར་མ་ཟད་འཇུག་ལྡོག་གི་གནས་སམ་ཡུལ་གོང་དུ་མ་འདུས་པ་ཐམས་ཅད་ལ་གོ་ཡང་ཆོག་འདྲ་སྙམ་མོ། །
说心咒分法
གཉིས་པ་སྔགས་ཉེ་བ་སོགས་ཀྱི་ཚུལ་བཤད་པ་ལ། མདོར་བསྟན་ཏེ་བཤད་པར་དམ་བཅའ་བ་དང་། དེའི་དོན་རྒྱས་པར་བཤད་པ་གཉིས།
略说立宗
དང་པོ། ཉེར་གྱུར་མངོན་དུ་ཕྱོགས་པ་དང་། །ཞེས་སོགས་ཚིགས་བཅད་གཅིག་གིས་བསྟན་ཏེ། དེ་ལྟར་བསམ་གཏན་དང་བཟླས་བརྗོད་ཉིད་བརྩོན་པས་བསྒྲུབས་པས་གསང་སྔགས་ཀྱི་ལྷ་དེས་སྒྲུབ་པ་པོ་བྱིན་གྱིས་བརླབ་རུང་བར་མཁྱེན་ནས་སྤྱན་དྲངས་རུང་མ་དྲངས་རུང་དེའི་དྲུང་དུ་བྱོན་པ་ནི་སྔགས་དང་ཉེར༷་གྱུར༷་ཏེ་ཉེ་བར་གྱུར་པ་དང་། སྔགས་ཀྱི་ལྷ་དེ་ཉིད་རང་གི་གནས་དེར་མདུན་ན་བཞུགས་བཞིན་རང་ལ་སྤྱན་རས་ཀྱིས་འཚོ་བ་ནི་ལྷ་མངོ༷ན་དུ་ཕྱོག༷ས་པ༷་ད༷ང་། གས༷ང་སྔ༷གས་ཀྱི་དངོས་གྲུབ་མངོན་དུ་སྟེར༷་བ༷ར་འགྱུར༷་བ༷་ད༷ང་། མི་འགྲུབ་པར་གཡེལ་ཞིང་གཞ༷ན་དུ༷་ཕྱོག༷ས་པ༷་ཡི་མཚན་ཉིད་ག༷ང་ཡི༷ན་པ༷་དེ༷་ཀུན༷་ཚང༷ས་པ༷་ཁྱོ༷ད་ལ༷་བཤ༷ད་པར་བྱའོ་ཞེས་ཞལ་གྱིས་བཞེས་ནས།
广说其义
གཉིས་པ་རྒྱས་བཤད་ལ། ཉེ་བར་གྱུར་པ་དང་གཞན་དུ་ཕྱོགས་པའི་རྒྱུ་བཤད་པ་དང་། ཉེ་བ་སོགས་ཀྱི་མཚན་ཉིད་བཤད་པ་གཉིས།
说近取及远品因
དང་པོ། གསང་སྔགས་ལ་སོགས་ནས། གཞན་དུ་ཕྱོགས་ཞེས་པའི་བར་གྱིས་བསྟན་ཏེ། འདི་ལ་ནང་གསེས་སུ་ལྷ་ཉེ་བའི་རྒྱུ་དང་། གཞན་དུ་ཕྱོགས་པའི་རྒྱུ་གཉིས་ཡོད་དེ། དེ་ཡང་ལྷ་མངོན་
9-4-18b
དུ་ཉེ་ཞིང་ཕྱོགས་པ་ཞེས་པ་ཅི་ལྟ་བུ་ཞེ་ན་གས༷ང་སྔ༷གས་དང་ལ༷་སོ༷གས་པའི་སྒྲས་རིག་སྔགས་ད༷ང་ལྡ༷ན་པ༷འི་རི༷ག་སྔ༷གས་ཀྱི༷་ཁྲོ༷་བོ༷་མ༷ང་པོ༷་ཀུན༷་ཞེས་པའི་སྒྲས། རིག་སྔགས་ཀྱི་གཙོ་བོ་དཀྱིལ་འཁོར་གྱི་ལྷ་དེ་ཉིད་ལ་དེའི་རིགས་སུ་གཏོགས་པའི་རིག་སྔགས་ཀྱི་ཁྲོ་བོ་ཁྲོ་མོ་མངག་གཞུག་ཕོ་མོ་དང་བཅས་པ་ཐམས་ཅད་གཙོ་བོ་རྒྱལ༷་བ༷འི་སྐུ༷་ལ༷་མངོ༷ན་དུ་ཕྱོག༷ས་པ༷ར། བས༷མ་ག༷ཏན་གྱི་བདེ་བས་ངོ༷མས་ཕྱིར༷་རྟ༷ག་ཏུ༷་གན༷ས་པ་ཡིན་ནོ། །དེ་ཕྱིར་སྒྲུབ་པ་པོས་ནམ་རིག་སྔགས་ཀྱི་བརྟུལ་ཞུགས་མངོན་དུ་བྱེད་པའི་ཚེ་རང་གི་མདུན་དུ་དེ་བཞིན་གཤེགས་པའི་སྐུ་བསམ་ལ། རིག་སྔགས་དང་གསང་སྔགས་དང་ཁྲོ་བོ་ཁྲོ་མོ་མངག་གཞུག་ཕོ་མོ་སོགས་ནམ་མཁའི་དབྱིངས་ཁྱབ་པར་ཡུད་ཙམ་བསམ་ཞིང་། རང་ཉིད་ཀྱང་ལྷའི་གཟུགས་ཀྱིས་དེ་རྣམས་ཀྱི་དབུས་སམ་ཁྲོད་ན་འདུག་ཅིང་སྔགས་ཀྱི་བརྟུལ་ཞུགས་གྲུབ་པར་བྱིན་གྱིས་བརླབ་པར་བསམ་པར་བྱའོ། །དེ་ལ་རིག་སྔགས་ནི་རིག་པ་ཡེ་ཤེས་ཉིད་སྔགས་ཀྱི་གཟུགས་སུ་ཤར་བའི་ཐབས་ཀྱི་ཆ་དང་། གསང་སྔགས་ནི་ཡུལ་ཆོས་ཀྱི་དབྱིངས་ཉིད་མཚན་མར་སྣང་བ་ཡུམ་མམ་ཤེས་རབ་ཀྱི་ཆ་ཡིན་ཞིང་། ཕན་ཚུན་ཟུང་དུ་འབྲེལ་བའི་ཕྱིར་རིག་སྔགས་ནི་ལྷ་མོའི་གཟུགས་དབྱིབས་དང་། དེ་སྟོན་པའི་སྒྲ་དང་ཕྱག་རྒྱ་སོགས་ཡིན་ལ། གསང་སྔགས་ནི་དེ་ལས་བཟློག་སྟེ་ཕོ་ཡི་དབྱིབས་སོགས་སུའང་གསུངས་སོ། །སྔགས་དེ་དག་རྣམ་མེད་ཆོས་ཀྱི་དབྱིངས་ཀྱི་རང་བཞིན་དུ་གནས་པ་དོན་གྱི་སྔགས་སམ་དོན་དམ་བདེན་པ་དང་། དེའི་བྱིན་རླབས་རྟགས་སུ་ཤར་བ་སྔགས་
9-4-19a
དང་ཕྱག་རྒྱ་སོགས་རྟགས་ཀྱི་སྔགས་སམ་ཀུན་རྫོབ་བདེན་པ་ཞེས་བྱ་ཞིང་བདེན་གཉིས་དབྱེར་མེད་དུ་གནས་པ་ནི་མཐར་ཐུག་གི་སྔགས་སོ། །དེ་ལྟར་ཤེས་པར་བྱས་ནས། རིག་སྔགས་ཀྱི་ལྷ་འཁོར་དང་བཅས་པ་དེའི་མདུན་དུ་བདག་གནས་ནས། སྔ་དྲོ་དང་ཉིན་གུང་ཕྱི་དྲོ་ཡི་དུ༷ས་གསུ༷མ་དུ༷་ནི༷་སྔར་བཤད་པའི་ཡིད་ཀྱི་ལས་ཕྲ༷་མོ༷་བསམ་གཏན་བྱ་བ་འདི༷་གས༷ང་སྔག༷ས་སྒྲུབ༷་པ་ལ༷་བརྩོན་པའམ་བརྟུན༷་པ༷་དེ་ཡི༷ས་ཚང༷ས་པ༷་ཞེས་བོས་ནས་རྟག༷་ཏུ༷་རི༷ག་པར་བྱ༷་བ༷་ཞེས་ཉམས་སུ་ལེན་དགོས་པ་ཡིན་ཏེ། སྔགས་ཉེ་ཞིང་ཕྱོགས་པའི་རྒྱུའི་གཙོ་བོ་འདི་ཡིན་པའི་ཕྱིར་ནའོ། །དེར་མ་ཟད་ཡ༷ན་ལ༷ག་བཅུ༷་ཡི༷་ཆོ༷་ག་ལ༷ས་མ་འདས་པར་རྟག་ཏུ་རིག་པར་བྱ་བའང་ཡིན་ནོ། །ཡན་ལག་བཅུ་ནི། བདག་དང་། རིག་སྔགས་དང་། བཟླས་བརྗོད་ཀྱི་དེ་ཉིད་གསུམ་དང་། མེར་གནས། སྒྲར་གནས། སྒྲ་མཐའི་བསམ་གཏན་གསུམ་དང་། སྒྲུབ་པ་ལ་འཇུག་པའི་ཆོ་ག སྦྱིན་སྲེག་གི་ཆོ་ག དབང་བསྐུར་བའི་ཆོ་ག གནས་ཀྱི་བྱ་བའི་ནན་ཏན་ཏེ་བཅུ་པོ་དེ་ལས་སྐབས་སུ་གང་བབ་པ་ལ་ནན་ཏན་དུ་བྱ་ཞིང་། དེ་དང་ལྷན་ཅིག་ལྷའི་རྣལ་འབྱོར་གྱི་མཚན་ཉིད་རིག་སྔགས་ཀྱི་བརྟུལ་ཞུགས་དེ་མངོན་དུ་བྱའོ་ཞེས་གསུངས་ཏེ། ལྷའི་རྣལ་འབྱོར་བྱ་བ་ལ་གསང་སྔགས་ལས་བྱུང་བའི་ལས་ཀྱི་བྱེ་བྲག་སྦྱོར་བའི་མཚན་ཉིད་མདོར་བསྡུ་ན་བཅུ་པོ་དེ་ཙམ་དུ་ཟད་པ་ཡིན་ནོ། །དེ་ལྟར་ཡན་ལག་བཅུ་དང་ལྡན་པར་བཟླས་པའི་བསམ་གཏན་ལ་འབད་པ་འདི་དག་སྔགས་ཉེ་ཞིང་མངོན་དུ་ཕྱོགས་ལ་དངོས་གྲུབ་རྩོལ་
9-4-19b
བའི་རྒྱུ་ཡིན་པས་ནན་ཏན་དུ་བྱའོ། །སྔགས་གཡེལ་ཞིང་གཞན་དུ་ཕྱོགས་པའི་རྒྱུ་ནི། མ༷་ད༷ད་པ༷་ད༷ང་། སྙོམ༷་ལས་སུ་གྱུར་པ༷་ད༷ང་། བཀྲེས༷་སྐོམ༷་གྱིས་ཟིལ༷་གྱིས་གནོ༷ན་ནས་བསྒྲུབ་མི་ནུས་པ་ཡང་དེ༷་བཞི༷ན་ཏེ༷། གཞན་ནད་ལ་སོགས་པ་ཡང་དེ་བཞིན་དུ་ཤེས་པར་བྱའོ། །རྣམ་རྟོག་འཕྲོ་ཞིང་རྒོ༷ད་པ་ད༷ང་འགྱོད་པ་མྱ་ངན་སོགས་ཡི༷ད་ཀྱི༷་གདུང༷་བ༷་ད༷ང་། སྔགས་སམ་སྔགས་ཀྱི་འབྲས་བུའམ་སྔགས་ཀྱི་ལ༷ས་ལ༷་ཐེ༷་ཚོ༷མ་ཟ༷་བ༷་ད༷ང་། བཟླ༷ས་བརྗོ༷ད་དང་བསམ་གཏན༷་ལ་ཡིད་རྩེ་གཅིག་ཏུ་མི༷་ཞེ༷ན་པ་ད༷ང་། སྒོ་གསུམ་དྲན་ཤེས་ཀྱིས་བསྡ༷མས་པ༷་ད༷ག་ནི༷་བཤི༷ག་སྟེ་ཐ་མལ་དུ་གནས་པ༷་ད༷ང་། ཅལ༷་ཅོལ༷་གྱི་གཏམ༷་ལ༷་ར༷བ་ཏུ༷་ད༷ད་ཅིང་མང་དུ་སྨྲ་བ་དང་། མི༷་བྱ༷་བ༷་སྟེ་བྱར་མི་རུང་བ་ལ༷་འཇུ༷ག་པ༷་ད༷ང་། ཕྱིའི་རྐྱེན་གདོན་རིགས་ལོ༷ག་འདྲེ༷ན་གྱིས༷་ནི༷་རྒྱུ༷ད་བརླམ༷ས་པ༷་ད༷ང་། དེའི་དབང་གིས་ཀུན་རྟོག་ངན་པ་འཁྲུག་ཅིང་། རྨི༷་ལ༷མ་ང༷ན་པ༷་རྣ༷མས་ཀྱང༷་མཐོ༷ང་བ་དང་། སེ༷མས་ཅ༷ན་ད༷ག་ལ༷་གནོ༷ད་པའི་ལས་བྱེ༷ད་པ་ད༷ང་། ལྷ༷་རྣ༷མས་ལ༷་ནི༷་མ་དད་ཅིང་ཡོངས་སུ་སྨོ༷ད་པ༷་ད༷ང་། འདི་དང་འདི་ལྟ་བུའི་བྱ་བ་རྣམས་སྒྲུབ༷་པ༷་པོ༷་སྔགས་བཟླ་བ་ལ་བརྩོན་པ་ཡི༷་ཆོ༷་ག༷་ལ༷་འཇུག་པ་ག༷ང་གི་ཚེ༷་འདི༷་ད༷ག་བྱེ༷ད་པ༷་ན༷། རྟག༷་ཏུ་ན༷ད་སོགས་ཀྱིས་འཚེ༷་བ༷་འབྱུང༷་བ༷ར་འགྱུར༷་ཞིང་། གས༷ང་སྔག༷ས་ནི་དེ༷་ལ༷ས་གཞ༷ན་དུ༷་ཕྱོག༷ས་པར་འགྱུར་ཏེ། འདི་ལྟར་མི་འདོད་པའི་བག་ཆགས་བསླད་ནས་ཡ་ང་བ་མ་སྤངས་པར་ལས་དང་ཉོན་མོངས་ཀྱི་མཐུས་སྔགས་ཀྱི་བྱིན་རླབས་ཀྱི་སྐལ་བ་ལ་གེགས་བྱེད་པ་དག་འབྱུང་བ་ཡིན་པས། བློ་དང་ལྡན་པ་དག་
9-4-20a
གིས་ཐབས་སྣ་ཚོགས་ཀྱི་སྒོ་ནས་ཉེས་པ་དེ་དག་ཅི་ནུས་སུ་གཞིལ་བར་བྱ་དགོས་ཏེ། གསང་སྔགས་མི་འགྲུབ་པའི་གེགས་ནི། རང་གི་སྔོན་ལས་མི་དགེ་བ་དང་། རྣམ་རྟོག་ངན་པ་དང་། སྐྱེ་བོས་སྡང་བ་དང་ནད་སོགས་རྣམ་སྨིན་ངན་པ་གསུམ་དུ་འདུ་ལ། ལས་ཀྱི་གེགས་བྱེད་པ་ཞི་ཕྱིར་བདག་མེད་པའི་བསམ་གཏན་བསྒོམ་པ་དང་བཟླས་པ་དང་སྦྱིན་སྲེག་སོགས་གཉེན་པོ་ལ་འབད་པར་བྱའོ། །སྔགས་བཟླས་ཀྱང་མ་དད་པ་སོགས་རང་རྒྱུད་ཀྱི་རྣམ་རྟོག་ངན་པས་གེགས་བྱས་ན་རྒྱུ་མ་ཚང་བའི་ཕྱིར་སྔགས་མི་འགྲུབ་སྟེ་རང་སྐལ་བ་དམན་པའི་ཕྱིར་རོ། །དེ་ལྟ་ནའང་རྣམ་རྟོག་ངན་པ་རྣམས་སོ་སོར་རྟོག་པའི་ཤེས་རབ་ཀྱིས་སུན་འབྱིན་པ་དང་། མཚང་ཕུག་བཏོལ་ཏེ་རང་བཞིན་མེད་པར་འདུལ་བར་བྱ་ཞིང་། གཡེང་བས་སེམས་ལས་སུ་མི་རུང་བ་ནི་ཏིང་ངེ་འཛིན་ལ་བརྩོན་པས་གདུལ་བར་བྱའོ། །སྐྱེ་བོས་སྡང་བ་སོགས་ལ་ཐབས་ཇི་ལྟར་རིགས་པས་སྤངས་ཏེ་བསམ་གཏན་གྱི་ཚེར་མ་མེད་པར་བྱ་ཞིང་། སྒྱིད་མ་ལུག་པར་དད་པ་བརྟན་པོས་སྔགས་བསྒྲུབས་ནས་དད་པས་གསོལ་བ་འདེབས་པ་དང་། སྙིང་རྗེའི་སེམས་ཀྱིས་སྨོན་ལམ་རྒྱ་ཆེན་པོ་ལེགས་པར་བགྱིས་ན་རིམ་གྱིས་གེགས་ཀུན་ཟད་ནས་དངོས་གྲུབ་འཐོབ་པར་འགྱུར་རོ། །
说近取等定义
གཉིས་པ་ལྷ་ཉེ་བ་སོགས་ཀྱི་མཚན་ཉིད་བཤད་པ་ནི། གང་ཞིག་ཞི་བར་འདུག་པ་དང་། །ཞེས་པ་ནས། དབང་དུ་གྱུར་པ་རྟག་པར་རོ། །ཞེས་པའི་བར་གྱིས་བསྟན་ཏེ་འདི་ལའང་ནང་གི་དབྱེ་བ་ཡོད་མོད། དེ་དག་ཚིག་གི་དོན་
9-4-20b
བཤད་པས་རྟོགས་པར་འགྱུར་རོ། །དེ་ཡང་བཟླས་བརྗོད་དང་བསམ་གཏན་བྱེད་པ་ག༷ང་ཞི༷ག་སེམས་ལས་སུ་རུང་ཞིང་། དུག་གསུམ་དང་རྒྱགས་པ་སོགས་མ་ལངས་པར་སྒོ་གསུམ་རབ་ཏུ་ཞི༷་བ༷ར་འདུ༷ག་པ༷་ད༷ང་། བཟླས་པའི་བསམ་གཏན་ལ་བརྩོན་པས་རྣམ་པར་ཤེས་པ་སྔགས་ཀྱི་སྒྲ་ཡི༷་ངོ༷་བོ༷ར་གྱུར༷་པ༷་ཞེས། སྒྲ་ལ་སེམས་ཀྱིས་དམིགས་པ་ཙམ་རྒྱང་ཆད་དུ་སྣང་བ་ལྟ་བུ་མིན་པར་དམིགས་པ་དང་སེམས་འདྲིས་ནས་སེམས་ཉིད་སྔགས་ཀྱི་རྣམ་པར་སྣང་བའི་གསལ་སྣང་བར་མ་ཆད་པ་ལས་མི་གཡོ་བར་གྱུར་པ་ན༷། དེ༷་ཡི་ཚེ༷་སྒྲུབ་པ་པོ་སྔ༷གས་པ༷་དེ་ནི་བསྒྲུབ་པར་བྱ་བའི་གས༷ང་སྔག༷ས་ལ༷་ཉེ༷་བ༷ར་གྱུར༷་ཏེ༷་ལྷ་མངོ༷ན་དུ༷་ཕྱོག༷ས་པའང་འཐོབ་བོ། །ཡེ་ཤེས་ཀྱི་ལྷ་ལ་ཉེ་བར་གྱུར་པའམ་བསྙེན་པ་དང་། རིང་བར་གྱུར་པའམ་བསྲིང་བ་མི་མངའ་མོད་ཀྱི་རང་གི་ལས་ཀྱི་སྐལ་བ་དང་། སེམས་ཀྱི་དབང་གིས་ཉེ་རིང་དུ་སྣང་བར་འགྱུར་རོ། །གཞན་ཡང་དབང་པོ་སོགས་ལྷ༷་ད༷ང་། སྲིན་པོ་སོགས་ལྷ༷་མི༷ན་གྱི་སེ༷མས་ཅ༷ན་ནི༷། ད༷བང་ཕྱུག༷་དང་ལྡན་ཞིང་མཁྱེན་པའི་ཡེ༷་ཤེ༷ས་འཇུ༷ག་པ༷་མངའ་བ་རྣ༷མས་གང་གིས་མཐོ༷ང་ན༷་མི་འདོད་པ་ཞི༷་བ༷་དང་ཕན་པ་སྐྱེ༷་བར་འགྱུར༷་བ༷་དེ༷་ནི་སྒྲུབ་པ་པོས་མངོ༷ན་དུ༷་གྱུར༷་པ༷་སྟེ༷་དངོས་སུ་མཐོང་བ་དང་། ཞེས་སོ། །འདི་ལ་ལྷ་སོགས་དེ་ལྟ་བུ་མཐོང་ན་སྔགས་མངོན་དུ་གྱུར་པ་ཞེས་སྦྱར་ཡང་རུང་མོད། རྩ་བའི་ཚིག་ནུས་ལྟར་ན་འདི་ལྟར་བཤད་པ་བདེ་བར་འདྲའོ། །གཞན་མིའི་རྒྱལ༷་པོ༷་ད༷ང་ནི༷་འབྱོར་ལྡན་ཕྱུག༷་པོ༷་རྣམ༷ས་ད༷ང་། སྐྱེ༷་བོ༷་དང་བུ༷ད་མེ༷ད་ད༷གེ་བ༷་སྟེ་སྐལ་བ་བཟང་པོ་རྣ༷མས་རང་གི་དབ༷ང་
9-4-21a
དུ་གྱུར༷་ཅིང༷་རང་ལ་ཡིད་མངོ༷ན་དུ་ཕྱོགས་པས་པུ༷ས་མོ༷་འཛུགས་ཤིང་སྤྱི༷་བོ༷ས་འདུ༷ད་པའང་ཕྱིའི་མཚན་མ་སྟེ་སྔགས་མངོན་དུ་ཕྱོགས་པའི་རྟགས་སོ། །སྔགས་པ་དེ༷་ལ༷་བློ་གྲོས་སམ་ཤེ༷ས་པ༷འ༷ང་སྔར་མེད་པ་སྐྱེ་བ༷ར་འགྱུར༷་ཞིང་སྔར་མ༷་ཐོ༷ས་པ༷འི་དོན་ལྟ་བུ་ཡ༷ང་བདེ་བླག་ཏུ་ཤེས་པ༷ར་འགྱུར༷་བ་ཡིད་ཀྱི་ཡོན་ཏན་དང་། སྐ༷ད་ཅི༷ག་ད༷ག་ལ༷་རང་གི་ལུས༷་ལ༷ས་ནི༷། བ༷ར་བ༷ར་མེ༷་བཞི༷ན་འོད་འབྱུང་བའམ་འབ༷ར་བ༷ར་འགྱུར༷་བ་ནི་ནང་གི་མཚན་མའོ། །བར་སྣང་སོགས་ལས་ཡིད་དུ་འོང་བའི་གླུ་དང་སི༷ལ་སྙན་གྱི་སྒྲ་རྣམ༷ས་ད༷ང་། ལྷ༷་རྣ༷མས་ཀྱི༷ས་ནི་གཏམ་སྨྲ༷་བ༷ར་ཡ༷ང་། ལྷ༷་མངོ༷ན་དུ་ཕྱོག༷ས་པའི་སྔ༷གས་པ༷་ཡི༷ས་དེ༷་ད༷ག་རྟག༷་ཏུ༷་ཐོ༷ས་པ༷ར་འགྱུ༷ར་བ་ཕྱིའི་མཚན་མའོ། །དེ་ལྟར་གསང་སྔག༷ས་ཀྱི་ལྷ༷་ནི་མངོ༷ན་དུ་ཕྱོགས་པ༷འི་སྒྲུབ༷་པ་པོ༷་ནི༷་མཐུ༷་ཆེན༷་པོ༷། བློ༷་གྲོས་ཅ༷ན་བརྩོན་པ་དྲག་པོའི་སྒོ་ནས་དཀའ་ཐུ༷བ་འགྲུ༷བ་པ༷་དེ་ཡི༷ས། གསང་སྔགས་མངོན་དུ་ཕྱོགས་པ་ལས་མ་ཉམས་ཤིང་དངོས་གྲུབ་འཐོབ་པའི་ཆེད་དུ། བཟླས་པ་དང་བསམ་གཏན་ལ་ཀུ༷ན་དུ༷་ཞེན་པ༷འི་དུས་རྟག༷་ཏུ༷་བྱ་སྟེ། སྔགས་མངོ༷ན་དུ༷་ཕྱོག༷ས་པ༷འི་གན༷ས་ཐོ༷བ་ན། གནས་སྐབས་སུ་ན༷མ་མཁ༷ར་རྒྱུ༷་བ༷་སྟེ་ལྷ་ཉིད་དུ་མངོ༷ན་པ༷འི་གན༷ས་འཐོབ་སྟེ། ཇི་ལྟར་ན་རང་གི་ལུས་ལྷ་གཞོན་ནུར་འགྱུར་ཞིང་། སྒོ་གསུམ་པོ་ཕུན་སུམ་ཚོགས་པའི་ཡོན་ཏན་ཅན། བདེ་ཞིང་སྐྱིད་པའི་དབ༷ང་ཕྱུག༷་གི་ཡོན་ཏན་མ༷ང་པོ༷་ཐོབ་སྟེ། དེ་ལས་མི་ཉམས་པར་རྟག༷་ཏུ་ལོངས་སྤྱོད་པ་ཉིད་དུ་གྱུར༷་ཀྱང༷་། ག༷ང་ཞི༷ག་གཏི་མུག་གི་དབང་གིས་འདོད་པའི་འཆིང་བས་མ༷་མྱོས༷་པ་དེ༷་ནི་སྔ༷གས་
9-4-21b
རི༷ག་པ་ཞེས་བྱ་ཞིང་། དེ་ལ་གས༷ང་སྔ༷གས་བསྒྲུབ་པའི་འ༷བྲས་བུ༷་མ༷་ལུས༷་པ༷། ཡེ༷་ཤེ༷ས་དང་དབ༷ང་ཕྱུག༷་ཕུན་སུམ་ཚོགས་པས་བརྒྱན༷་པ༷་ཡ༷ང་ཐོབ༷་ལ༷། སྒྲུབ་པ༷་པོ༷་དེ་ཉིད་འདོད་པའི་ཡོན་ཏན་དང་ལྡན་པའི་དགའ་བས་མྱོས༷་པ་དང་ལྡན་པའི་ལྷ་ཡི་ག༷ནས་ནི༷་མི་ཡི་གནས་ལས་མཆོག༷་ཏུ༷་གྱུར་བར་འགྲོ༷་བར་འགྱུར་རོ། །དེ་ལྟར་ནའང་སྔགས་རིག་པ་དེ། ར༷ང་གི༷་མཐུ༷་ཡི༷་ཤེ༷ས་པ༷ས་རྒྱུད་གས༷ལ་བར་གྱུར་པའི་ཕྱིར་བག་མེད་པར་འདོད་པས་མྱོས་ནས་སྔགས་ཀྱི་བརྩོན་པ་གཏོང་པར་མི་འགྱུར་རོ། །དེ་ལྟར་གནས་སྐབས་སུ་ལུས་སེམས་བདེ་ཞིང་སྐྱིད་པའི་དབང་ཕྱུག་ལ་ལོངས་སྤྱོད་བཞིན། སྔགས་ཀྱི་ལམ་ལ་བརྩོན་པ་མ་བཏང་བར་བྱས་པའི་མཐར་ཐུག་གི་འབྲས་བུ་ནི། སངས་རྒྱས་རྡོ༷་རྗེ༷་ལྟ༷་བུའི༷་སྐུ་ཅ༷ན་གྱི༷་གས༷ང་བ༷འི་མཆོ༷ག་སྐུ་གསུང་ཐུགས་ཀྱི་འབྱོར་བ་མི་ཟད་པ། དག་ཅིང་ཚ༷ངས་པ༷་མཆོག་གི་གོ་འཕང་འཁོར་བའི་ཉེས་པའི་སྐྱོན༷་མེ༷ད་པ་ག༷ང་ཡི༷ན་པ༷། རྫུ་འཕྲུལ་ལ་སོགས་པའི་ཡོན་ཏན་ཚད་མེད་པ་གང༷་ཞིག༷་ཐོ༷བ་ན༷ས། གཏན་བདེ༷ར་འགྱུར༷་བ༷་ཡོན་ཏན་ཐམས་ཅད་ཡོ༷ངས་སུ༷་རྫོ༷གས་པ༷་རྒྱ༷ལ་བ༷་བཞི༷ན་དུའོ། །དེའི་ཕྱིར་སྔགས་སྒྲུབ་པ་ནི་ཕན་ཡོན་དང་དགོས་པ་ཤིན་ཏུ་ཆེ་བའི་ཕྱིར་ན། སྔགས་བསྒྲུབ་པ་ལ་གཅིག་ཏུ་སྤྲོ་ཞི༷ང་ལུས་སེམས་སྟོབ༷ས་ད༷ང་ལྡན༷་པ༷ར་ནི༷། བཟླས༷་བརྗོ༷ད་དང་བས༷མ་ག༷ཏན་དཀ༷འ་ཐུབ༷་ཀྱི་གནས་ལ་བརྩོན་པ་བསྟེན་པའི་མི༷ས་གས༷ང་སྔགས་ཀྱི་ར༷ང་བཞིན་མེ༷་ལྟ་བུ་ཡི༷ས་ནི༷། སྔོན་གྱི་ཚེ་རབས་བརྒྱུད་མ་ནས་བྱས་པའི་སྡི༷ག་པ༷་ཐ༷མས་ཅ༷ད་བསྲེ༷ག་པ༷ར་བྱའོ༷། །དེ་ཡང་སྔོན་གྱི་ཚེ་རབས་རྣམས་སུ་བྱས་པའི་མི་དགེ་བ་དང་ཉོན་མོངས་པའི་དབང་གིས་
9-4-22a
ཕལ་ཆེར་སྔགས་བསྒྲུབ་པ་ན་ཡང་སེམས་ལས་སུ་མི་རུང་བ་དང་། ནད་དང་གདོན་སོགས་རྐྱེན་སྣ་ཚོགས་པས་གེགས་བྱེད་པ་འབྱུང་ན་ཡང་། སྔགས་ལ་བརྩོན་པ་མ་བཏང་ན་སྡིག་པ་རྣམས་ཀྱང་རིམ་པས་བྱང་བར་འགྱུར་ལ། བསམ་གཏན་ལ་བརྩོན་པ་ལུས་སེམས་ཤིན་ཏུ་སྦྱང་བ་འཐོབ་པར་འགྱུར་ཏེ། འདི་ལྟར་གན༷ས་ད༷ང་ཁ་ཟ༷ས་ད༷ང་གྲང༷་བ༷་ད༷ང་ཆར༷་ད༷ང་རླུང༷་ད༷ང་ཚ༷་བ༷་རྣམས་ལ༷་ལུས་ཀྱིས་བཟོད་ཅིང་སེམས་ཀྱིས་ཅི༷་མི་སྙམ༷་པ༷ར་ན༷མ་ཞིག་འགྱུར༷་ན༷་དེ་ཡི༷་ཚེ༷་སྔགས་བསྒྲུབ་པའི་ལ༷ས་ཀྱི༷་འབྲས༷་བུ༷་ཆུད་མི་ཟ་བར་ཉམས་སུ་མྱོང་བར་ངེ༷ས་པར་འགྱུར་རོ། །འདི་ནི་གཙོ་བོར་ལུས་ཀྱི་ངང་བརྟན་པར་གྱུར་པའི་ཡོན་ཏན་ནོ། །ཡིད་ཀྱི་ཡོན་ཏན་སྔགས་ཟླ་བའི་ཚེ་བཟླ་བྱའི་སྔགས་ཀྱི་སྒྲ༷འ༷མ་ཡ༷ང་ན༷་ལྷའི་གཟུག༷ས་ལ༷འ༷ང་ག༷ང་བརྩོ༷ན་པ༷འམ་དམིགས་པའི་ཚེ་ན་ནི༷་མི༷་རྨོང༷ས་པ༷་སྟེ་རང་བྱན་ཚུད་པའི་ཤེར་ཏིང་གསལ་བ་ན་སྔགས་ཉེ༷་བ༷ར་གྱུར༷་པ༷་དེ༷་ཤེ༷ས་པ༷ར་བྱའོ༷། །སྔགས་ལ་བརྩོན་པའི་དཀ༷འ་ཐུ༷བ་ཅ༷ན་གྱིས༷་ཕྱི་དང་ནང་གི་ཉེ་བར་འཚེ་བའི་གནོ༷ད་པ༷་སྤང༷ས་ཏེ་དེ་དག་གིས་མི་གནོད་ལ། སྒྲུབ་པ་པོ་ག༷ང་ཞིག་མཐོ༷ང་བ༷་ཙམ༷་གྱིས༷་ནི༷། མི་དང་མི་མིན་སྦྲུལ་དང་གཅན་གཟན་སོགས་སེ༷མས་ཅ༷ན་ཐམ༷ས་ཅ༷ད་བྱམ༷ས་པར་འགྱུར༷་བ༷་དེ༷་ནི༷་དངོ༷ས་གྲུབ༷་ཉེ༷་བ༷ར་འགྱུར༷་བ་ཡིན་ནོ། །གཞན་ཐམས་ཅད་བྱམས་པས་ན་དེ་ལ་འགལ་བར་བྱེད་པའི་བགེ༷གས་རྣ༷མས་ཐ༷མས་ཅ༷ད་ཀྱང༷་རྣམ༷་པ༷ར་སྤང༷ས་ཏེ་མི་འབྱུང་བ་ཡིན་ནོ། །དེ་ལྟ་ན་བསྲུང་བ་སོགས་མི་དགོས་སམ་ཞེ་ན། བདེ༷་བ༷་ད༷ང་ནི༷་སྡུ༷ག་བ༷སྔལ་གྱི་ལས་སྣང་གི་མཐའ༷་ལ་སྤྱོད་པ་དང་། བདེ་བ་ལ་འ༷དོད་
9-4-22b
པ་ད༷ང་སྡུག་བསྔལ་ལ་ཁྲོ༷་བ་ད༷ང་། དགྲ་སོགས་ཀྱིས་འཇི༷གས་པ༷་ད༷ང་ན༷ད་ད༷ང་འཆི༷་བ་ད༷ང་གནོ༷ད་པ་སྣ་ཚོགས་པ་ད༷ག་གི༷་རྒྱུ༷་ནི༷་ནང་རང་གི་རྒྱུད་ཀྱི་བག་ཆགས་ཡིན་ལ་དེ་ནི་སྔག༷ས་པ༷་གང་ཞིག་གནས་སྐབས་སུ་གནོད་པ་སྣ་ཚོགས་དང་བྲལ་བ་རྣ༷མས་ལ༷འང་ཡོ༷ད་པས། གནོད་པ་སྲུང་ཞིང་བསལ་བའི་ལས་ལ་བརྩོན་པ་ནི་དགོས་པ་ཡོད་དེ། ནང་གི་རྒྱུ་དེ་རྐྱེན་དང་ཕྲད་ན་བར་དུ་གཅོད་པའི་བགེགས་དང་གེགས་སུ་གྱུར་པ་འབྱུང་སྲིད་པའི་ཕྱིར་རོ། །ན༷མ་ཞི༷ག་སྔགས་ཤིན་ཏུ་ཉེ༷་བ༷ར་གྱུར༷་པ༷་དེའི་ཚེ་ན༷། ད་ལྟའི་དུ༷ས་ཚོད་ད༷ང་ཡུལ༷་ད༷ང་བྱ་བ༷འི་ཁྱད་པར་ད༷ང་། སྔོན་གྱི་ལ༷ས་ཆོས༷་ད༷ང་ཆོས༷་མི༷ན་གྱི་འབྲ༷ས་བུ༷་སྨིན་པ་ལ༷། དེ༷་ཚེ༷་སྔ༷གས་པ༷་ཅུང་ཟད་ཀྱང་མི༷་ལྟོས༷་སོ༷། །རི༷ག་སྔ༷གས་ཉེ༷ར་གྱུར༷་འདོ༷ད་པ༷་སྟེ་ཉེ་བར་གྱུར་ནས་རིག་སྔགས་གྲུབ་འདོད་པ་སྟེ་གྲུབ་ཏུ་ཆ་བ་ད༷ང་རལ་གྲི་སོགས་ཀྱི་དངོས་གྲུབ་གྲུབ༷་པ༷་ད༷ང་ནི༷་དེ༷་བཞི༷ན་དུ་མཆོ༷ག་ཐོབ་པ་དེ་ཡི་ཚེ་ན་སྔར་ཉེ༷ས་པ༷་སྟོང༷་ད༷ག་བྱས༷་པ༷་ཡིན་ན་ཡ༷ང་། བཟོ༷ད་པ༷ར་འགྱུ༷ར་བ༷ར་དོ༷གས་པ༷་མེ༷ད་དེ། སྐབས་འདིར་དངོས་གྲུབ་ཐོབ་པ་ལ་སྔར་གྱི་ཉེས་པས་ཅུང་ཟད་གཡོ་བར་མི་ནུས་སོ། །དེ་ལྟར་ན་སྔོན་གྱི་ལས་དང་ད་ལྟའི་དུས་སོགས་རྐྱེན་རྣམས་ཀྱིས་དངོས་གྲུབ་ཐོབ་པའི་ཚོགས་པ་ཚང་པ་ལ་གེགས་བྱེད་པ་ཡིན་ནའང་རིག་སྔགས་ཉེ་ཞིང་དངོས་གྲུབ་ཀྱི་ཚོགས་པ་ཚང་ནས་ནུས་པ་མཐུ་ཅན་ཐོགས་མེད་དུ་གྱུར་པའི་ཚེ་སྔགས་ཀྱི་ནུས་པ་མཐུ་ཆེ་བས་སུས་ཀྱང་བརྫི་མི་ནུས་ཏེ། ནོར་བུར་འབད་པས་བཙལ་བ་རྙེད་པར་གྱུར་ན་འདོད་པ་ཅི་དགར་བྱིན་པ་ལྟ་བུ་ཡིན་པས་གཞན་ལ་ལྟོས་པ་མེད་པའི་ཕྱིར་སྔགས་ཉེ་བའི་མཚན་མ་བརྟན་པོ་ཐོབ་པ་ན་སྒྲུབ་པ་བརྩམ་
9-4-23a
པར་བྱ་སྟེ་དུས་ལ་ལྟོས་པ་མེད་དོ། །དངོས་གྲུབ་ཐོབ་པ་དེ་ཡང་། རི༷གས་ལས་བྱུང༷་བའི་དངོས་གྲུབ་དང་རྫས་ལས་བྱུང༷་བའི་དངོ༷ས་གྲུབ༷་གཉིས་སུ་དབྱེ་བ་ཡོད་དེ། རིགས་ལས་བྱུང་བ་ཞེས་པ་དངོས་གྲུབ་ཀྱི་རྫས་ལ་མ་བརྟེན་པར་ཡང་། མངོན་ཤེས་སམ་ལྷ་སོགས་དང་སྐལ་བ་མཉམ་པའི་དངོས་གྲུབ་ཐོབ་པ་ལ་སོགས་པ་ནི་ལྷ་ཉིད་ལས་ཐོབ་པས་རིགས་བྱུང་ཞེས་བྱ་ལ། རལ་གྲི་དང་མིག་སྨན་སོགས་གྲུབ་པ་ནི་རྫས་ལས་བྱུང་བ་ཡིན་པ་ད༷ང་། གཞན་ཡང་བཅུད་ཀྱིས་ལེན་པའི་སྨ༷ན་གྱི༷ས་ཡ༷ང་ནི༷་ལུས་ཅ༷ན་ལ༷། གསང་སྔགས་ཉེ༷་བ༷ར་གྱུར༷་པ་ད༷ང་སྔག༷ས་མངོན་དུ་གྲུབ༷་པ༷་ན། གྲུབ་པ་རབ་འབྲིང་ཐ་མ་གང་གྲུབ་ཀྱང་། དེ་དང་དེ་ལྟར་སྔགས་པས་སྤྱད་དུ་བྱུང་བའི་ཚུལ་གྱིས་རང་དབ༷ང་དུ༷་གྱུར༷་པ༷ར་བྱེད་ཅིང་རྟག༷་པ༷ར་ལོངས་སྤྱོད་པར་འགྱུར་རོ༷། །
竟义
བཞི་པ་འཇུག་གི་དོན་ནི། བསམ་གཏན་ཕྱི་མ་རིམ་པར་ཕྱེ་བ་རྫོགས་སོ། །ཤྭ་ལོ་ཀ་ལྔ་བཅུ་རྩ་གསུམ་མོ་ཞེས་སྐད། བསྟན་པ་སྔ་དར་གྱི་དུས་སུ་བསྒྱུར་བའོ། །བསམ་གཏན་ཕྱི་མའི་རྒྱུད་ཀྱི་དོན་རྒྱ་ཆེར་བཤད་པ་མཁས་ཤིང་དངོས་གྲུབ་བརྙེས་པའི་སློབ་དཔོན་སྔགས་ཕྱི་རྒྱུད་ཀྱི་ཤིང་རྟ་ཆེན་པོ་སངས་རྒྱས་གསང་བས་མཛད་པ་ལོ་ཙཱ་བ་ཆེན་པོ་སྐ་བ་དཔལ་བརྩེགས་ཀྱིས་འགྱུར་བ་ཉིད་ལ་བརྟེན་ནས་འགྲེལ་པ་རིག་སྔགས་འཛིན་པའི་ཡིད་ཀྱི་འདོད་འཇོ་ཞེས་བྱ་བ་འདི་ཉིད་མི་ཕམ་འཇམ་དཔལ་དགྱེས་བའི་རྡོ་རྗེ་ཞེས་བྱ་བས་རབ་ཚེས་མེ་ལུག་ཆུ་སྟོད་ཟླ་བའི་ཚེས་ཉི་ཤུ་ལ་མགོ་བརྩམས་ནས་ཕྱི་ཉིན་ཉེར་གཅིག་པའི་སྔ་དྲོར་
9-4-23b
གྲུབ་པར་བྱས་པ་འདིས་སྔགས་བསྒྲུབ་པ་རྣམས་ཀྱི་རེ་བ་ཡིད་བཞིན་དུ་སྐོང་བ་དང་སེམས་ཅན་ཐམས་ཅད་ལ་དངོས་གྲུབ་རྣམ་གཉིས་ཀྱི་དཔལ་སྦྱིན་པར་གྱུར་ཅིག རིག་སྔགས་བཟླས་བརྗོད་བྱེད་པར་འདོད་པ་ལ། །ཐབས་འདི་རེ་བ་ཡིད་བཞིན་སྐོང་བ་ཡི། །རིན་ཆེན་དབང་གི་རྒྱལ་པོ་ལས་ལྷག་པས། །སྔགས་འཛིན་རྣམས་ཀྱི་སྙིང་དབུས་དགའ་སྟོན་མཛོད། །ཅེས་སྨྲས་སོ། །མངྒལཾ།། ༈ །།མེ་གླང་ལོར་༧སྐྱབས་རྗེ་མཁྱེན་སྤྲུལ་རིན་པོ་ཆེས་འདི་དག་སྤར་དུ་བཀོད་དགོས་པའི་བཀའི་ཅོད་པན་སྤྱི་བོར་བཅངས་ཏེ། ངེས་སྒྲོན། བསམ་མཆན་བཅས་འཕྲུལ་སྤར་སྒྲོས་གཙང་ལེགས་པར་བགྱིས་པའི་བསོད་ནམས་དཔག་ཡས་གང་དེས་བསྟན་པ་མཆོད་ཡོན་ཟུང་གི་ཞབས་པད་བརྟན་ཅིང་། མཛད་འཕྲིན་སྣང་བ་དཀར་པོས་ཡོངས་སུ་སྐྱོང་བས་འགྲོ་རྣམས་བདེ་དགའི་དཔལ་གྱིས་འཚོ་བ་དང་། བདག་ཀྱང་སྐྱེ་བའི་ཕྲེང་བར་རྒྱལ་བའི་ཆོས་མཛོད་འཛིན་སྐྱོང་སྤེལ་ལ་ནམ་ཡང་མི་ངལ་བ་འདི་ལྟར། མི་ཕམ་འཇམ་པའི་དབྱངས་ཀྱི་ཐུགས་བསྐྱེད་དང་། །མཛད་པ་སྨོན་ལམ་མཁྱེན་བརྩེ་ནུས་པའི་ཚུལ། །བླ་མེད་ཡེ་ཤེས་སྒྱུ་འཕྲུལ་ཇི་འདྲ་བ། །དེ་འདྲར་ཁོ་ནར་བདག་སོགས་འགྱུར་བར་ཤོག །ཅེས་སྤར་དཔོན་བླ་མིང་ཏིང་འཛིན་ཆོས་གྲགས་ཀྱིས་དགེ་རྩ་དང་འབྲེལ་བའི་སྨོན་ལམ་བཏབ་པ་དེ་དེ་བཞིན་དུ་འགྲུབ་པར་གྱུར་ཅིག་གུ། དགེའོ། །སརྦ་མངྒལཾ།། །།
9-5-1a

